Ballygunge Mizoram House hralh an ui

Kolkata-a Mizo awmte chuan Kolkata Mizoram House pathum zinga pakhat, Ballygunge ami tih ral a ni chu an ui viau a, Culcutta High Court ah thu a kal mek tih an sawi.
Kolkata-a press tour-a thang mek Mizoram Journalists’ Association member-te chu Calcutta Mizo Welfare Association-in zanriah an buatsaih sak a. Kolkata khawpui chhunga Mizoram House pathum zinga pakhat, Ballygunge hmun ami tihral an la ui reng thu hi an sawi a. High Court-a thu inchiah mek a awm thu an sawi a ni.
Kolkata khawpui chhungah thalai, spa/ parlour a thawkten tun hnuah zahawm takin hna an thawk tawh a. Chhungkua an chawm tawh tih an sawi a. Heng bakah hian hnamdang nen nupa anga cheng dun mipa leh hmeichhia an awm awm an hriat loh thu an sawi.
Tunhma lama Mizo hming chhiat tawhna thin, hmeichhe zurui leh ngaihzawng inchuh avanga buaina tenau ang chi chu tun hnuah an tawk ta lo niin an sawi bawk.
Calcutta Mizo Welfare Association-ah hian member 700 an awm a, Kolkata-a Mizo awm zahve vel Mizo Welfare-a inziaklut lo an awm. Association-ah hian Zohnahthlak tawh phawt chu an tel thei a, thihna avangin Mizoram chauh loah pawh ruang an thawn chhuak thin a. Kumin chhungin Welfare hian ruang 18 an thawn chhuak tawh a ni.