Bana kaih leh a behbawm…

Bana kaih scheme hi chu kan hrechiang thawkhat tawh a. Bana kaih ve lohte hian scheme behchhan tur an nei ve ta rih lo va, kaitu nei lo hi a tam zawk an nih a rinawm a, dawmkan ngai nasa hlei hlei an ni awm e.
Nimina policy coordination committee review meeting neihnaah khan, bana kaih scheme kalpuitu department 16 hnuaiah dilna 1314 a luh tawh thu tarlan a ni a. He batch hmasa ber hi nodal officer ten an thlitfim hnuah Novemebr ni 21-ah apex body-in an endik leh ang a, November thla chhung vekin progress partner thlanchhuah ten training an nei ang a, nakum 2025 January atanga hma la tan thei turin ruahmanna siam a ni.
He scheme hnuaia progress partner-ten an mamawh zat loan an lak theihna tura sawrkarin hma a lakpuina tur leh quarantor-a a tansak bakah, loan rul thate interest a tumsakna tur hi, he scheme laimu leh a thatna a ni. Progress partner-te hian, loan interest pek ngai lo tura thahnemngai taka tan lak hi an tum vekin a rinawm a, chu chuan project hlawhtlinna a tisang hle tura beisei a ni a, kan state hian kan thatpui viau maithei a ni. Hetiang scheme ngaihtuah chhuaktu sawrkar hi a fakawm hle a; chutih rual chuan a risky ve viau tho mai a, loan rul tha thei lo an awm hlauh chuan sawrkarin mawh a phur dawn a ni si a. Sawrkar laipui hnuaia Startups hrang hrang zinga ‘Credit Guarantee Scheme for Startups (CGSS)-ah chuan loan-ah 80% thleng quarantee siam a nih bakah, interset hniam zawk leh repayment pawh hun rei zawk hawnsak a ni a, hetiang deuha kalpui ve theih hi a duhawm hle a ni.
Hetih lai hian, bana kaih ve loh, bana kaih ngai ngawih ngawih zawkte hi thlauhthlak phah nan sawrkar hian a hmang mai ang tih a hlauhawm a. Sawrkar hi tlang chhipa awm angin ngai ila, tlang lawn mekte zinga thahrui ngah leh chak zawkte chu tlang chhipah a lo pawt kai zung zung a, thahrui ngah lo leh chak lo zawkte erawh a ban phak loh avangin tlang chhip an thleng ve thei ta lo va, chung mite chuan sawrkar kut phar chhuah an vawn phak ve loh avangin, tlang chhip an lo thlen ve theih nan sawrkar hian hrui sei tak a thlaksak ve ngei chu a pawimawh dawn hle a ni.