Bana Kaih thawh 2-na kalpui dan tur rel tan
Mizoram sawrkar flagship programme ‘Bana Kaih Scheme Phase II’ kalpui dan tur relin Mizoram State Policy Coordination Committee chu Ningani khan an vice chairman, adviser to chief minister (Handholding) Dr KC Lalmalsawmzauva hoin an thukhawm a. MSPCC member-te bakah a kaihhnawih department hotute leh bank aiawh an tel.
MSPCC vice chairman chuan sawrkar department 16 kaltlangin Bana Kaih Scheme hnuaiah diltu 11456 an awm a. Implementing department nodal officer-te, bank leh apex body-in an zirchian hnu ah, Bana Kaih Scheme (loan component) hnuaiah mi 646 leh Chief Minister’s Special Package-ah mi 2257 thlan an ni tih a sawi. Progress partner tan hian orientation training buatsaih niin, an bank account-ah hma an lakna tur sum hi thun mek a ni tih a sawi bawk.
Bana Kaih Scheme-a progress partner-te tana loan ruahman sakah sawrkar chu guarantor-a a tan bakah loan an lak atanga a pung awm a rulh sak dawn avangin, hlawhtling tura theihna leh thiamna nei, mi taima leh rintlak thlan an nih zel theihnan fimkhur a pawimawh tih a sawi a. Tanpuina dawngte hmalakna pawh uluk taka vil tur a ni tih a sawi.
Thutkhawmah hian Bana Kaih Scheme dilna thehluhna portal ennawn niin siamthat ngai lai sawiho a ni a. Portal siamthat a, engemawchen tih danglam a ngaih dawn avangin dilna thehlut tawh, ennawn tura portal-a la awm chu portal thar hman theiha peihfel a nih hunah a thara thehluh a tul leh dawn tih sawi a ni.
CM Special Package dilna form ennawn a nih bakah online-a dil theiha ruahman dan, progress partner tur chu kum 18-60 inkar nise tih a ni a. Mizoram Khadi & Village Industries Board chu implementing agency-a telh thar a ni. Dilna lut tawh engemawzat ennawn niin Commerce & Industries hnuaia dilna 18 ennawn chu pawm a ni.
Bana Kaih Scheme Phase II hi August thla chhunga kalpui hman tum a nih thu sawi a ni bawk.