Bandh neih tum hi mipui tan a ni – MNF vice president

Bandh neih tum hi mipui tan a ni
– MNF vice president
Forest (Conservation) Amendment Act 2023 pawm an duh loh lantirna atana MNF party-in total bandh neih an tum chu anmahni tan ni loin Mizoram mipui tan a ni tih MNF vice president Lalchhandama Ralte chuan a sawi.
Thawhtannia Mizo Hnam Run inkhawmah leader of opposition Lalchhandama Ralte hian, ZPM sawrkarin central duh dan leh mipui rawn loa FCAA 2023 a pawm avangin Article 371G hnuaia ram neitu kan nihna a su buai a, Mizo mipui thlavang hauh total bandh an nei dawn tih a sawi.
FCAA chu do tul an ti a, sut leh a nih theihna turin September 3 khan Assembly speaker hnenah special session koa ennawn leh turin an thlen a. Hun engemaw chen an ngaihchan hnuah ram leh hnam humhim turin Mizoram pum huap total bandh neih an titlu ta tih a sawi a ni.
“Buh lu chuh laia total bandh siam hi a inthlahrun a. Kan ram humhalh a, mipui thlavang hauh a tul avangin hreh tak chungin kan kaltlang a ngai a ni,” a ti.
ZPM sawrkar chuan FCAA adopt tur hi an House-a introduce dawn atangin a ruk thei ang berin an ti a, an pass-naah pawh khan MNF member-te chuan remti an tihpui lo tih leader of opposition hian a sawi a. FCAA 2023 rules leh guidelines pawh FCAA an pass atanga thla hnih hnu, October 16 khan Forest minister-in a pe chauh tih a sawi bawk.
Chief minister Pu Lalduhoma’n India danpuia Article 371G chu ‘Mizo hnam rohlu’ tiin sawi thin mah se, tunhnaiah Bengal Eastern Frontier Regulation 1873 hnuaia Govt of India Act 1935-in a adopt zel a. India independence hnuah Adaptation of Laws 1950 hnuaiah British sawrkar dan siam kha India-in a chhawm a. Mizoram pawh state a nih khan Section 43 of the Mizoram State Act 1986 kan hmang chho ve zel, tiin, ILP leh ownership and transfer of land chungchangah Article 371G awm lo mah se, kan hnam him angin a sawi duh tih Lalchhandama Ralte hian a sawi.
“State List Entry 45 (land revenue), Section 3 The Mizo District (Transfer of Land) Act 1963 (tribal ram humhalhna), Section 98 (2) of the Mizoram Land Revenue Act 2013 tuna hman mek, ram transfer phal lohna chu 371G awm lo mah se, inhumhimnan a tling tih tlukin Pu Lalduhoma hian a sawi bawk. Heng dan a sawi zawng zawng hi Parliament-in a repeal thei vek a. Mizoten special constitutional protection kan neih that ber chu Article 371G a ni,” a ti.
FCAA-ah sixth schedule hnuaia District Council thuneihna pawh a tiderthawng ta vek, tiin, an hnuk kir lo a nih chuan theihtawpin hma an la zel dawn tih a sawi a ni.