Washington-ah thlawhna insu pahnih luiah tla

Washington-ah thlawhna insu pahnih luiah tla
Passenger phur thlawhna, passenger leh thawktu mi 64 chuanna chu vansangah US Army helicopter nen an insut hnuah Washington DC-ah luiah a tla.
Potomac River atang hian mi zawng leh chhanchhuah hna thawktuten ruang 18 an la chhuak tawh a, tui hi a khang theihna khawpa vawt a nih karah an dap zel tih CBS chuan a tar lang.
US thuneitute chuan an chhui zui mek a, a bul lawka Ronald Reagan Washington National Airport-a thlawhnate pawh che chhuak lovin dintir vek an ni.
An ram huna Nilaini zan dar 09:00 (India-a Ningani zing dar 07:30) vel khan PSA Airlines tlawhna, American Airlines 5432 hminga che hi Ronald Reagan Washington National Airport pan mek US Army helicopter nen an insu niin Federal Aviation Administration (FAA) chuan a sawi.
Passenger phur thlawhna, Bombardier CRJ700 hi Wichita, Kansas atanga Washington pan niin passenger 60 leh thawktu pali an chuang niin American Airlines chuan a sawi.
Pentagon chuan helicopter hi Sikorsky H-60 niin an sawi a, Fort Belvoir, Virginia atanga thlawk chhuak a ni a. US sipai pathum an chuang niin CBS chuan a tar lang.
FAA chuan thil thleng hi National Transportation Safety Board (NTSB) nen an chhui dun nghal tih a puang.
Thuneitute atangin thi leh hliam sawi a la awm lo va; mahse, CBS chuan tui atangin ruang 18 lak chhuah tawh a nih thu an sawi.
A tirah chuan US chanchinbute chuan passenger phurtu hi Potomac River-ah hian a chanvea bungin a awm niin an tar lang a, helicopter pawh a letlingin a awm niin an tar lang bawk.
Police leh fire department-ten khaw vawt tak hnuaiah dam chhuak zawn hna an thawk nghal a, police lawngleng an hmang bawk.
An zawng leh an che vel hi lui bul lawka Ronald Reagan Airport atang pawhin hmun theih a ni.
Ari Schulman-a chuan thlawhna tumhmun panna, George Washington Parkway-a a inkhelh laiin thlawhna tla hi a hmuh thu NBC Washington a hrilh.
A lan danah pawh thlawhna chu a pangngai lo deuh tih a hmuh theih a, ding lam ngerin luiah a innghat chawrh niin a sawi a. A tum sual nasa hle niin a ngai a, a thim em avangin chiang tak erawh chuan a hmu lo niin a insawi.
Thlawhna chu a tek chuai chuai a, bati lian tak ang maiin a lu atanga a mawng thlengin a tek zawr zawr reng niin a sawi.
Jimmy Mazeo-a pawhin a thiannu nen tumhmun bula zanriah an kil dun laiin thlawhna tla hi a hmu a. Ronald Reagan Airport-a tum tur chi ‘hawi zawng dik lo deuhvin a thlawk’ nia a hmuh thu a sawi.
Mazeo-a hian emergency services an thlen hnuah chauh chetsualna a thleng tih erawh a hriat thu a sawi thung.
President Donald Trump chuan chhiatna thleng chu a ngaihven reng thu a sawi a. Thite pawh Pathianah thlamuang takin chawl se a duh thu a sawi.
“A hmu hmasate rang taka an lo chet chhuah avangin ka lawm tak zet a ni,” a ti bawk.
Vice Prseident JD Vance, Defense Secretary Pete Hegseth leh Transportation Secretary Sean Duffy te pawhin thil thleng chu an thlithlai reng thu an sawi.
American Airlines CEO Robert Isom chuan thlawhna insu a awm chu ‘pawi a ti tak zet’ tih a an airline website-a video an dahah a sawi bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More