Bangladesh-ah PM lai Sheikh Hasina bawk

Bangladesh Prime Minister Sheikh Hasina chu a zawn zatin term li thlan tlin a ni ta a. Mahse, tun tum inthlan erawhin sawisel a hlawh nasa hle thung.
Awami League tena chakna an chan leh hnuah Hasina chuan kum nga dang office luah leh dawnin parliamentary seat 300 awmah 223 an la a ni.
Opposition lian ber Bangladesh Nationalist Party ten inthlan an boycott avangin inthlan hma hauh atangin Hasina party leh an thawhpuite chu chaksa tura ngaih an ni a. BNP te chuan inthlan chu a lem mai mai an tihsak.
Inthlan hmain BNP leader leh supporter tam tak te mankhawmin an awm a. Official figure chuan vote tla 40% vel tiin mahse hei ai hian a hniam zawk rin a ni a. Inthlan hnuhnung ber kum 2018 ah kha chuan vote tla 80% chuang a ni.
Political analyst Badiul Alam Majumder chuan election commission chuan vote thlak zat chu a tipung mai mai a ti a. “Kan hriat dan leh media report hrang hrang atangin election commission sawi leh thil nihna dik tak a inang lo,” tiin a sawi.
Awami League party mi leh sa tho Independent-a dingte pawhin seat 45 lai an la a, hei bakah hian Jatiya Party chuan seat riat an la ve bawk a ni.
Tun hi Hasina-in term nga a chelhna tur ni tawhin kum 1996 khan thlan tlin hmasak ber niin kum 2009 khan thlan tlin leh a nih hnu atangin thuneihna a la chang ta char char a ni.
“He rama democracy chhunzawm a nih zel theih nan ka theih tawp ka chhuah a ni,” tiin Hasina chuan vote a thlak hnuah a sawi.
Awami League general secretary Obaidul Quader chuan Hasina chuan party leader leh supporter te chu chakna an chan lawmna nei lo turin a ti tiin a sawi.
Human Rights Watch (HRW) te chuan nikum 28 October a opposition rally a tharumthawhna chhuaka mi 16-in nunna chana mi 5,500 chuangin hliam an tawrh phah hnuah thuneitute chuan activists 10,000 chuang an man an ti a. Sorkar chu lung ina Awami League mi leh sa an elpui ber te khungkhawmah puh an ni.
Awami League tena chakna an chan leh tak hnuah Bangladesh-ah party pakhat chauhin thuneihna an chan hlen hlauhna a lian hle thung a. Sorkar chuan opposition crackdown a kalpui chu a chawlh an ring lo bawk a. Opposition leh civil society group tena sorkar legitimacy a zawhna an nei zui zel a nih phei chuan sorkar chu a che na tial tial turah an ngai bawk.
Opposition BNP te chuan inthlanna chu independent caretaker sorkar hnuaia neih ni se tia ngenna an siam Awami League tena an pawmpui duh loh hnuah inthlan an boycott thu an puang a ni.
“Peaceful leh non-violent movement chu nasa zawkin kan kalpui chhunzawm reng dawn” tiin Tarique Rahman, BNP acting chairman chuan a sawi a. Rahman hi Hasina hmelma kumhlun prime minister hlui Khaleda Zia fapa a ni a, Zia chu tunah eiruk thubuai avangin house arrest a dahin a awm mek bawk.
Kum 2018 khan Rahman chu kum 2004 a Hasina campaign rally neihnaa grenade hmanga buaina siamah puh niin dam chhung lung in tang tura tih a ni a. Kha mi tum khan Hasina-in hliam tuarin mi 20 in nunna an chan phah bawk a.
“Keimah min puhna tin te hi behchhan nei lo vek a ni a, politics thila phuba lakna vek a ni,” tiin Rahman chuan a sawi a, tunah London-ah a awm mek thung.
Hasina thlawptute thung chuan Bangladesh-ah political stability a thlen tiin an fak ve thung a. “Democratic process kan kalpui tlat avangin politics lama ngelnghehna a awm a ni. He thilah hian khawvelin Sheikh Hasina hi an fak tur a ni” tiin Law Minister Anisul Hug chuan a sawi.
Hasina-in kum 15 chhunga a thiltih ropui ber chu ‘Bangladesh mipuite hnenah confidence tuhin, tunah chuan mahni inrintawkna an nei tawh’ tiin a sawi bawk.
Hasina hnuaiah hian Muslim majority Bangladesh khawvela ram rethei ber pawl hian kum 2009 atang khan economic lamah hmasawnna nasa tak a hmu a.
Khawvela a awmna lai bial vela economy thang chak ber pawh ni hmanin a thenawm India pawh than chak lamah a khum hial a. Tun hnai kum sawm chhungin a per capita pawh a let hnih chuanga pungin World Bank chuan tun hnai kum 20 chhungin mi maktaduai 25 chuang rethei bakberh atanga khaichhuahin an awm a ti a. China tih loha garment siam chhuak hnem ber a ni bawk.
Mahse a economy chu pandemic hnuah kum 2022 kum laihawl vel atang khan harsatna a tawk chho tan ta a ni. Inflation sang leh IMF in loan a peka tihmakmawh a tihngai a tih tur nen sorkar chuan harsatna a tawk nasa ngei dawna ngaih a ni a.
Nikum September thla khan Washington chuan Bangladeshi official te chu democratic election process tikhaw lo anga ngaiin visa restriction a lo kalpui tawh bawk a. UN leh international organisations te pawhin human rights abuse leh lungawilote hmehmih tumna nasaah sawisel an nei bawk.
Mahse Hasina chuan India-in a thlawp chhung chuan Khawthlang ram tena an hrekna chu a hlau lo tia sawi a ni thung a.
Khawthlang ramte chuan Bangladesh garment industry a concession pek te tihtawp a nih chuan hnathawk maktaduai tel te a tam ber hmeichhia te chuan an tuar nasa dawn an ti bawk.
Hasina hian kum 1996 khan prime minister nihna a chelh hmasa ber a. Kum 2009 ah thlan tlin leh a nih hnuah prime minister la ni char charin Bangladesh history a prime minister ni rei tawh ber a ni bawk.
Tuna thlan tlin a nih leh hnua a term a hmang zo a nih chuan kum 81 mi a ni tawh dawn a. Amah thlaktu tur tu nge niang tih chu Bangladeshi te inzawhna lian ber pawl a ni bawk.