Hun engemaw chen Bangladesh a\anga a hlawm lian thama Mizorama lut raltlan an awm loh hnuah May ni 18 khan a huhovin, \hahnem tham tak an lut leh; mi 206 te’n Mizoram an thleng.Ramri velah BSF an duty ngawrh avangin kumin kum tir lam atang khan Bangladesh atanga Mizorama tlanchhiat tumte’n Mizoram an thleng hlei thei lo a, a thleng theite pawh BSF te hela a ruka lut, sawmhnih bawr te tea lut an ni. Hun engemaw chen hnuah a hlawm lian an thleng thar leh a, BSF te hela harsa taka Mizorama lut an ni tih thu dawn a ni.
Mi 206-te hian Lawngtlai district-a Vathuampui khua an thleng a, hetah hian an la awm rih. Thuneitute’n hmun dangah an dah dawn em tih hriat a ni rih lo.
Lawngtlai district thuneitute’n an chhinchhiah danin, a hmain Bangladesh atanga raltlan hi mi 772 an awm a, mi 206 te’n an belh a nih chuan raltlan mi 978 vel an awm tihna a ni.
Thu dawn danin, Bangladesh-a Chittagong Hill Tracts hi an la ralmuang lo hle a, Zo hnahthlakte chuan Mizorama tlanchhiat an duh fur. Mahse BSF an duty ngawrh avang hian an che thei lo a, tlem te tea insem darhin Mizoram hi an pan thin.
Nilaini pawh khan Chittagong Hill Tracts-ah hian an inkap nileng deuhthaw nia sawi a ni a, Lawngtlai district-a Parva III khua atang pawhin silai ri an hre pha tih thu dawn a ni.
Bangladesh atangin a huhovin raltlan lut leh
Get real time updates directly on you device, subscribe now.
Next Post