Inthlan laiin MPF fir lehzual tum
Kumin MLA inthlanpui neih turah political party te nen thawhhona thuthlung an siam tawh zawm a nih theihna’n fir lehzuala kal an tum tih Mizoram People Forum chuan an sawi.
MPF Gen. Hqrs. hruaituten zawhna an chhan danin, tum dang zawng aiin kumin MLA inthlan kaihhnawihah inthlan thianghlim leh dik a awm theihna’n an theih chin chinah fir taka kal an tum tih an sawi a. Party tan lam nei chu Pastor an ni emaw, kohhran upa an ni emaw NGO hruaitu pawh nise, MPF-ah tel lo ngam turin an inchah lawk tih an sawi.
Political party-te nen thawhhona thuthlung an siam bawhchhetute chu a tul anga mipui hriata puanzar thlengin hma lak an tum tih an sawi a ni.
Party-te nen thawhhona thuthlung an siam zingah, house to house campaign neih loh a tel a. Hetah hian candidate te chauh ni loin, party bilin in tin luhchhuah ang chi pawh a tel. House to house campaign tihtawp hi party lam ngenna avanga tih leh tak a ni tih MPF general secretary Rev Lalramliana Pachuau chuan sawiin, “Kum 2006-ah party-te nena inrawnnaah house to house campaign hian pawisa sem leh danin a phal loh thildang tih nan a remchang tiin khap an rawt a. 2008 inthlanah hman tan a ni. 2018 MLA inthlanah MPF member kaihhruainaa neih nise, tih a ni a. Party lam atang bawkin hei hi an tlin lo tih sawi a awm leh a ni,” a ti.
Party aiawh thenkhat chuan house to house campaign hi neih pawi ti lo an awm chungin, an sawihonaah neih loh hi tha party lamin tha an ti tlang ta zawk tih MPF hruaitute chuan an sawi a ni.
Mipui lam, a bikin thalaite zingah sum leh ther hlo sem lam an ngaisang lo tan viau nia a lan thu an sawi a. MPF thil tum chu inthlan felfai neih ngawr ngawrah a tawp mai loa, sawrkar a din hunah sawrkarna tha nei thei tura bawhzui lam pawh huam tel tul an ti tih an sawi a ni.
MPF hian political party nen thawhhona thuthlung an siam, anmahni barh mai ni lo, party lam pawhin lungsi taka hming an ziahhnan pui chu kumin inthlanah zawm theuh turin an inngen thar tih an sawi a. Political party leh politician-te thu leh hla thehdarh kawngah chanchinbumite leh social media lama thu thehdarh thinte chu fimkhur tur leh thu belhchian dawl lo thehdarh lo turin an ngen tih an sawi a ni.
Political party-te ngenna:
# Candidate-te leh an campaigner-te sum leh therhlo hmanga campaign lo tur leh vote lei lo turin.
# Mimal chungchang leh tualchhung thil chauh niloin, party policy leh manifesto te campaign na’n hmang a, dawt leh thu belhchian dawl lo, finfiah nghal theih loh hmangtea inbei lo turin.
# Tlin duh vanga party tih turte leh hmathatna te anmahni vote loh vanga chang ve lo tur leh a vote-tute duhsak bik tur anga invauna leh intihthaih zawnga campaign lo turin.
# Party insawichhiat vak vak hi tih loh ni se; sawrkar kal tawh leh kal mekten kan ram tan thil tha tak tak an ti tawh tih kan hre theuh a. Thil tha tih engmah nei lo ang maia inchirhtheh vak vakte hi a tha lo a. An thiltih chhunzawm tlakte chu chhunzawm zel hi a puitling zia zawk a ni.
# Thlantlinte pawh sum leh nihna (position) duh vanga inhralh loa, a tul ang zela ruling leh opposition MLA-te thawk ho a, intanpui tlang tur leh dikna leh rinawmna nen rorel turin.
-- Advertisement --
Mipui ngenna:
# Sum leh therhlo hmanga lei theiha awm lo turin. Chutianga sum leh therhlo hmanga inlei tlin tumte chu lo hnar ngam tur leh vote lo turin.
# Thawhhona thuthlung bawhchhiat pawisa loten ram dan leh inkaihhruaina, kohhran leh khawtlang inkaihhruaina an ngaipawimawhin a rinawm loh a. Chuvangin election dan, model code of conduct palzut a, thawhhona thuthlung bawhchhe luite hi chu ram hruaitu tha an ni loang tih a chiang a, chutiang mi chu vote lo ngam turin.
# Mi rinawm, dik leh tha nia kan hriatte huaisen taka thlang turin.