Bangladesh atangin raltlan la lut zel

2022 kum tawp atangin Bangladesh a\angin Mizoramah raltlan an lut a, 2023 kum chawhnu lamah pawh lut thar an la awm reng.May thla atanga Manipur atanga raltlan rawn lutte’n an thawm a hliahkhuh ta deuh a ni mai thei a, mahse Bangladesh atang hian Zo hnahthlak raltlan lut thar an la awm reng. Raltlante luhna Lawngtlai district bawrhsap office atanga thu dawn danin, chawlhkar liam taah pawh khan lut thar hi mi 32 an awm a, Thawhtanni pawh khan lut thar an la awm.
A tir lam angin a ruala mi thahnem tham rawn lut chu an ni lo a, mahse lut thar hi an la awm ve deuh reng, an ti.
Raltlante hi chhinchhiah zel tur an ni na a, chhinchhiah nghal zel theih an nih loh bakah mahni remchan dana lo lut te an nih thin avangin chhinchhiah loh pawh engemaw zat awm turah ngaih a ni. Lawngtlai bawrhsap office chuan mi 1092 an ni tawh tiin an chhinchhiah.
An chhinchhiah danin, puitlingah mipa 334 leh hmeichhia 311 an awm a, naupang (kum 18 hnuai) mipa 242 leh hmeichhia 207 an awm.
Raltlante hi Lawngtlai district-a Parva-III, Vathuampui, Mautlang, Chamdur P-I, Hmawngbu, Bungtlang South, Hruitezawl, Hmunnuam, Tuithumhnar leh Bungtlang South II-ah te sorkarin a awmtir a ni.
Bangladesh-a Chittagong Hill Tracts-a Zo hnahthlak, Mizorama tlanchhiat tumte hi BSF te’n lo dan an la tum reng a, BSF te helin a rukin an rawn lut thin. Hei vang hian raltlan hi an tam lo zawk tih thu dawn a ni.