Haryana-ah Congress leh AAP te?

Haryana State chuan inthlan a hmachhawn mai dawn tawh a, politicalparty te chu an buai mep mep hle. Inthlan hnaih tawh ruaiah zawhna lian tak awm mekin – Congress leh Aam Aadmi Party (AAP) te chuan Lok Sabha poll alliance chu an chhawm nung thei dawn em tih a ni.
Kar kalta lawk khan NDTV tena an kawmnaah Chief Minister hlui Bhupinder Singh Hooda chuan party pahnih te thawhhona turin inbiakna a awm lo a ti a. “Alliance kan neih kha chu national level ah a ni a. A bak chu kan la inbe leh lo. Haryana-ah hi chuan BJP leh Congress te inbeihna a ni” tiin a sawi.
Kumin kumtir lama Lok Sabha inthlanah khan Congress te chuan Haryana-ah seat nga an la a, kum 2010 a seat zawm zawng zawng 10 BJP te lak vek lakah chuan hmasawnna nasa tak a ni. AAP te chuan Lok Sabha seat pakhatmah an la ve lo thung.
Hetih lai hian Congress leader Rahul Gandhi chuan AAP te nena thawhho leh thawho loh tur chungchangah party leader ngaihdan la in nimin lawk khan party election meeting neih a ni bawk a. Hooda chuan Congress te chuan Seat 90 awmna Haryana Assembly election ah AAP te hnenah seat 3-4 pek an remti thei ang tiin a sawi a. Mahse, official tak chuan Congress ten AAP te nen thawhhona lam sawipuina an la nei lo.
Rahul Gandhi chu Lok Sabha-ah Opposition leader ni mek niin kumin Lok Sabha inthlanah khan BJP te chuan majority an phak lo bawk a. Haryana Assemblya INDIA bloc in chakna an chang leh a nih chuan BJP tan chuan hnualrawihna tur a ni dawn bawk a ni. Congress leadership chuan oppsoition bloc tihchaka INDIA bloc ah pawh big brother nih an tum nasa bwk a, Parliament chhung leh pawnah BJP te an nawrna hle bawk. Haryana inthlanh pawh vote inthenhran tur dalin Congress te chuan alliance anga kal an thlang thei zawk tia sawi a ni.
Senior AAP leader leh MP Sanjay SIngh chuan Rahul Gandhi an party senior leader te AAP te nena thawhho dan zawng tura a tihna chu lawmawm a tih thu a sawi a. Singh chuan thutlukna tawp chu money laundering case a lung in tang mek Delhi Chief Minister Arvind Kejriwal thutlukna tur a ni a ti thung.
“Kan tum ber chu BJP te hneh a ni a, kan Haryana in-charge Sandeep Pathak leh Sushil Gupta te chuan sawi dunna neiin thutlukna an siam ang a, chu chu Arvind Kejriwal hrilhin a niin thutlukna a siam ang” tiin a sawi.
A hma chuan Kejriwal chuan AAP te chuan Haryana seat 90 an chuh vek tur thu a lo sawi tawh thung a.
Congress leh AAP te hi Lok Sabha inthlanah khan seat awm zawng zawng 10 ah thawk dunin leh Chandigarh parliamentary seat-ah nen an thawkho va. Congress-te chuan seat nga bakah Chandigarh seat te an la a, AAP te chuan seat khat mah an la ve lo thung.
Inthlan result puan hnuah AAP’s Haryana leader te chuan an candidate Sushil Gupta, Kurukshetra-a a chaklohnaah Congress te an dem thu an sawi a. Khavang khan Assembly inthlanah pawh tanho leh theihna tiharsatu tur ni theia ngaih a ni.