Barca chesual nawn duh lo tluang zel

Barca chesual nawn duh lo tluang zel
Spanish La Liga season kal laiah draw vawi khat an nei ve tawh tih loh Barcelona-in point an hloh then duh lo chhunzawm zel a, Ningani zan league match pakhat zawkah pawh si phur hmasa zet chungin Real Oviedo mualah 3-1 hnehna an chang a, khelh rukah pahnihna luah chhunzawmin, an chung chiaha hmahruaitu Real Madrid nen point hnihin an inthlau.
Municipal Carlos Tartiere stadium-a thutna awm zawng zawng zat ticket an hralhchhuah vek zana mipui 29,850 pungkhawmte khan minute 33-ah goal hmasaber an thlirliam a; Barcelona goalkeeper Joan Garcia tihsual hlawkpuia Alberto Reina goal hmangin mualneitu team-in hma an hruai a, kha goal khan lawmtu a hlawh ngang mai!!
Mikhual team lamin chawlhlawk hmain an si phurh sut hman lo mah se second half tir lam minute 56-na lekah Eric García chuan a naupan lai club lamah Barca siphurh a sut.
Team talbuai Oviedo hian goal dang khung belh chu sawi loh goal hnih dang an chhuah belh a; Catalan team goal hnihna hi minute 70-a Robert Lewandowski thawh niin, ti hian, Pole hian La Liga team 25 a hmachhawn tawha team 21 lakah goal a khung ta a ni.
Poland captain Lewandowski goal hi Casado thlaktu Frenkie de Jong siamsak a ni.
Chak nemnghehna atan hun pangngai tawp hma minute hnih la awmah Ronald Araujo chuan Marcus Rashford chhawp sak atangin mikhual goal thumna a thawh ve leh a, season kal laiah Blaugrana-in tlawm an la pumpelh tluang zel.
A corner chhuih atanga goal a luh leh tak hnuah tun kha league game vawi thuma Englishman Rashford-a’n assist a neihna a ni ta.
Kha game-ah khan Arsenal leh Spain midfielder hlui Santi Cazorla chuan kum 40 mi ni tawh chungin Asturian club tan La Liga game-ah starting line up a luah a; a hming lam rik a nih rualin home supporter-te thawm a tha!
Cazorla hi kum 2003 khan Real Oviedo chuan sum lama harsatna an tawh avangin loh theih lohin an hralhchhuak a; a naupan lai atanga a vawn tawh club tan khan senior level-ah a khel hman lo.
Arsenal-a kum ruk a khawsak chhung khan hliamin a tibuai fo a; kum 2023 khan Real Oviedo-ah kirlehin, La Liga 2 promotion play-offs hnehna a chanpui hnuah a club chu kum 2001 hnu lama a vawi khatna atan top flight-ah a kirpui.
Ningani zanah season ka lai league-ah a tum khatna atan bul a tan a, a team tlawm tur chhan zo loin, Barcelona laka an goal khat neihchhun kha tun season-a Oviedo goal hnihna chauh a la ni a, game ruka point thum chauh la hum chungin relegation zone-ah an la tang chhunzawm ta zel a ni.