Barca hmahruaina chhah leh
Inrinni zanah 3-1-a an mikhual Espanyol hnehin Real Madrid chuan an chung chiaha La Liga hmahruaitu Barcelona nena an inkar point rukin an pawtzim hman a, Pathianni zanah Catalan team hian sikhat faia Athletic Bilbao hneh ve lehin, Bernabeu club nena an inkar hi point kuaah bawk an dahkir leh.
Kartawp Pathianniah league title inchuha inum mek Spanish club ropui pahnih hian Nou Camp-ah El Clasico an khel dawn a, he league match-a an chak leh chuan Xavi Hernandez-a team hi title race-a dingchang zawk tur thlirin an thlir theih thuak tawh awm e!
Pathianni zan Bilbao khaw khel-mual San Mames Stadium-a goal awmchhun leh mikhual Barca chakna goal ni zui ta kha first-half hun pekbelha Raphinha tihluh niin, second half-ah mualneitu team tlawm hreh tan khawh na tak hmuh tur a awm zui a; Barca goalkeeper Marc-Andre ter Stegen chuan vawi duai lo an lama lut tur dangin, hun tawp hnaih lamah Bilbao hian an siphurh sutna tur nia ngaih an chang lo zui leh bawk.
Inaki Williams goal chu rei ngial Video Assistant Referee (VAR) en-diktir a nih hnuah ‘handball’ tia hnawlsak a ni a, Barca an him leh hram!
Athletic Bilbao central midfielder Oier Zarraga goal tur pawhin line a pel dawn chiah tihin Jules Kounde chuan a hnawlchhuak hman hlauh a, mikhual team an him nawn leh!
Ernesto Valverde team Bilbao hi season kal lai league-a an vawi 10 chak lohna chiah niin, table-ah pa-kuana an luah zui thei hram hram a; Pathianni zanah point hlawhchhuak zo lo mah se an khelh danah an tum-ruhzia a hmuh theih a, an vannei tawk lo tiin a sawi theih ang.
Hliam avanga chawl det Barca top scorer Robert Lewandowski chu Pathianni zanah khelmual lut thei khawpin a dam leh tawh a, a tir lamah goal thun theihna hun remchang hmu nghal bawk mah se a shot chu Julen Agirrezabala dan hman a ni hlauh.
A hnuah Bilbao lam hian inhnaih tak takin hun remchang an hmu chhun-zawm ve nghal zat a, mahse, Williams-a pet chu Ter Stegen tan dan theih loh khawp a ni lo a, Raul Garcia tauh pawhin goal kham a per.
Chawlhlawk dawnah Barca lamin goal an thun ta nge nge a, midfielder Sergio Busquets ball pek la fuhin box chhunga tan khawh Leeds forward hlui Raphinha chuan Agirrezabala dan zawh lohin a chhuihlut a, a game khelh hnuhnung pahniha a goal hnih thunna hi assistant referee flag avangin a khaihlak leh rih a, VAR hmanga endik a nih hnuah Brazilian goal chu pawmsak a ni.
Second half-ah mualneitu Bilbao kha team khawng zawk an ni a, mahse, Alex Be-renguer leh Iker Muniain-te goal tur chu Ter Stegen-a’n pui takin a dansak.
Hemi hnu pawh hian Bilbao lamin an siphurh sutna goal an lawm hman zet a, mahse, Williams-a goal chu a inirhchhuah chhoh vel laia Muniain-a ‘handball’ avangin pawmsak a ni lo.
Inkhelh banah Barca coach Xavi Hernandez chuan harsatna an tawh leh thu sawi chungin kha aia tha zawka khelh an mamawh thu leh na zawka nawr tur an nih thu a sawichhuak a, “Inkhelh har-satna stadium-ah sikhat faiin hma kan hruai a, kan goal neih hum thei hram mah ila a tawp lamah kan tuar na mawlh mawlh hle a; engpawhnise, hnehna rangkachak a ni. Ka han sawinawn leh hram duh chu kha aia attacking na zawk kha kan mamawh tih hi ni teh se,” a ti.
Barcelona hian league khelh 25-a point 65 hum chungin an hma-hruaina an sawhnghet leh sauh a; heti zat game-ah Real Madrid lamin point 56 hum ve bawkin, Spanish giants tan title race-a beiseina pan tak nei zui thei turin Pathianni Camp Nou inkhelah hnehna chan ngei a pawimawh tawh khawp ang a, point hnih an hloh then emaw an chak lo emaw a nih chuan Catalan team hmakhalh turin kawng a ping titih tawh tura ngaih a ni.
San Mames chhunga thutna awm zawng zawng hralh zoin fans 40,000 zetin an mikhual Barca kha auhzam tum hle mah se Xavi Hernandez-a team-in hnehna hlu tak an sualchhuak zui ta hram a; chutih laiin man-of-the-match atana Barcelona goal-veng Ter Stegen thlan a nih daih danah khan mualneitu team lam pawh an awm mai mai biklo tih a hriat theih ang!
Barca hmahruaina chhah leh
Get real time updates directly on you device, subscribe now.
Prev Post
Next Post