Juve-in top six 6 hnaih ve zel

Juve-in top six 6 hnaih ve zel
Italian Serie A title neitu emaw tihtur khawpa cham-pion ngun Turin khaw team kha tunhnai kum enge-mawti chhoah hian an kang hlei thei ta tlat lo a, season kal lai Serie A lamah pawh Pathiannia an mikhual Sampdoria laka 4-2 hneh-na chang chungin table-ah pasarihna an luah chho ve ta hram a, season thara European compe-tition khelh phakna hniam ber parukna dinhmun luahtu Atalanta chu point liin an la pha lo fo!
Massimiliano Allegri team Juventus hian league khelh 26-a point 38 nei chungin hma an sawn ve hret hret a; Pathianni Turin khaw inkhelah midfielder Adrien Rabiot chuan first half leh second half-ah goal khat ve ve khungin, Gleison Bremer leh Matias Soule-te’n mualneitu team tan an thun ve bawk.
Juve hian hliam avang-in an player pawimawh an chhawr thei lo nual a; training laia a tihrawl tina midfielder Paul Pogba chu kan hma international break zawh thleng a chawlh a ngai dawn a; karliamta Ningani Europa League-a sikhat faia an German mikhual SC Freiburg an hneh hram tuma inhliam Angel Di Maria, Federico Chiesa leh Alex Sandro pawh Serie A mawngphah Sampdoria lakah an chhawr thei lo.
Allegri chuan French player Pogba inhliam thu sawiin, “Tukin zing khan free kick a pet chhinna lamah a tihrawl a tina leh palh hlauh a, naktuk lamah a hliam dinhmun enfiah a ni dawn a, tun Ningani leh kartawp Pathianni hi chuan kan chhawr hman a rin-awm loh a, international duty-a chhuakte an lokir hunah chauh kan beisei theih tawh hmel,” a ti.
Tlakhniam theihna hmun atanga inhaichhuak tura chak mamawh Genoa khaw club Sampdoria khan khelh 26-ah point 12 hum ve tawhin, tun dinhmunah point 12 ngawtin safety zone an hlat tawh a, top flight-a kum 11 an in-hamtan tawhna a der-thawng takzet tawh a ni.
Roma top-four beiseina
Pathianni zan Serie A inkhel dangah AS Roma chuan an khelmual hman thiam Stadio Olimpico-ah point an thawkchhuak zo lo a, an mikhual Sassuolo chuan Rome khaw team lakah hian 4-3 hnehna changin, point thum nena pathumna luah chho thei tur kha panganaah Roma an thu leh ta rih a, nizan result tarlan hman lohah an chung chiaha palina luahtu AC Milan an chak phei chuan Jose Mourinho team hian point thumin Milan hi an pha lo tawh ang.
Nizana Sassuolo an mikhual hma thleng khan khelh 25-ah San Siro club-in point 47 neiin palina an luah a, match khata khel tam zawk chunga point 47 ve bawk neitu AS Roma kha chak se top three luah chho thei an nih laiin top four pawh an hlat tulh tulh thei dawn niin a lang!
Pathianni zanah Por-tuguese coach Mourinho chuan touchline atangin a team a enkawl thei lo a, kumin February thla tawp lama 1-2-a mualneitu Cremonese an hneh loh tuma an hnawhchhuah vang kha a ni.