Barca kechheh a pelh

Spanish La Liga table-a pahnihna luahtu Real Madrid-in Inrinni zan Madrid derby-ah an mikhual Atletico Madrid hneh zo loin point khat chauh an hlawhchhuak a, hmahruaitu Barcelona tan Pathianni zanah point 10-a hmahruai falna hun remchang nei mah se Almeria khelmual atangin point an hawn zo lo mauh mai a, league hmahruaitu pahnih hi point sarih bawkin an inthlau chhunzawm.
La Liga bika game sarih chhung chak tluang lai Catalan team hi table-a 15-na luahtu Almeria laka harsatna lian tawk lo tura ngaih an nih laiin Xavi Hernandez-a team hian hun pumin goal an khung zo lo tluanchhuak a; first half minute 24-a El Bilal Toure goal awmchhun pawh an sut zawh loh avangin mual-neitu team-in an kawt-kaiah beisei loh point thum an thawkchhuak lel a, point 25 nen point hnihin bottom three an kalsan mek a, tlak-hniam pumpelh beisei-na an nei lian sawt.
Karliamta Ningani Europa League-ah Man-chester United hneh loin an tla fel hlimhlawt a, kartawp tualchhung league-ah tlawm chhun-zawm lehin, chawlhkar khat chhunga tlawmna lian vawihnih an tawn-buakna a ni ta reng mai!
Manchester khaw-puia 2-3-a an chak loh hma khan inelna hrang hrangah Nou Camp club hian match 18 chhung zet tlawm an pumpelh hman a, La Liga lama game sarih chhung an chak-zawn hnuah team khawng pawh ni lo Almeria an ngam lo ringawt a, season hmawrbawk hnaih lamah Xavi team an talbuai chhunzawm zel dawn em kan thlir ang!
Pathianni zan in-khelah mikhual team kha chiang zawka tlawm thei tur an nih laiin Leo Baptistao goal ni thei tura lang hman chuan Barca goalkeeper Marc-Andre ter Stegen a pel zo lo hlauh a; Rodrigo Ely pawhin hnai set sawt atangin corner atanga ball chhuak ven lohin goal ban pawnah a tauhchhuak ve bawk.
Barcelona manager Xavi Hernandez chuan Movistar Plus hnenah an result avanga a thinrim takzet thu sawichhuakin, season kal laia an game chhe ber la ni hiala a ngaih thu leh a bik takin first half an khel chhe zual niin a sawi a, kartawp inkhel danga Real Madrid tlawm ve loh laia point hmuh loh kha an tan a remchang hlawl lo tih a tarlang tel.
Barca midfielder hlui chuan, “Vawiin hi chhah zawka hmahruai theihna hun rangkachak a nih laiin kan tawp dan a chhe takzet a, chhuanlam sawi tur engmah kan nei lo a, season kal laia kan game chhe ber kan pholang mai a ni,” a ti.
First half-a si an phurh hnu khan chawlhlawk laiin Xavi khan sub-stitution panga ngawt siam bawk mah se Almeria tlarhnung in-khuahkhirh tha lutuk an paldarh zo ngang lo!
Barcelona an hma-chhawn hmaa an game hnuhnung pariata vawi-khat chiah chak Al-meria-in league point thum hlu tak nen thatho leh nung zawkin ‘relega-tion’ pumpelh an sual chhunzawm thei ang.