Barcelona in Xavi an ban

Spanish club lian FC Barcelona chuan an manager Xavi ban turin thutlukna an siam ta a, an manager thar atan Bayern Munich manager hlui Hansi Flick rawih an tum.
Barcelona midfielder ropui Xavi chuan kum 2021 aTang khan a ropuina Barcelona a enkawl Tan a, kum 2025 thleng daih contract a ziak. Catalan club lian a enkawl tirh lamah a cheTha chho viau a, La Liga-ah a champion pui nghal. 2023-24 season-ah erawh beisei an phak ta lo viau thung a, trophy lak nei lovin season an khar dawn. Beisei anga an chetThat tak loh bakah pressure a tam vangin Xavi hian season tawp ruala a ban tur thu January thla khan a lo puang tawh. Xavi hian a ban tur thu puang tawh mah se club thuneitute nen indawr in, a contract neih mek hmang zo turin an inrem a, ban a tum leh rih lo. Season khat dang cham tura an inrem hnu lawkah Xavi hian media hmaa club chungchang a comment danin club thuneitute a tilawm lo viau a, a dinhmun a derthawng thar leh. Dinhmun derthawng taka a awm hnuin club thuneitute nen an indawr nawn leh a, inThen turin thutlukna an siam zui ta a ni. Barca hian pathianni zan hian Sevilla an mikhual dawn a, hei hi Xavi-a’n Barcelona a enkawl hnuhnung ber tur a ni.
Xavi an ban tak vangin Barcelona hian manager thar tur an zawng nghal a, Bayern Munich manager hlui Hansi Flick chu an manager thar ni tura an duh ber a ni a, indawrna neiin inremna an nei thei dawn hnai niin tarlan a ni.