Congress president leh Rajya Sabha leader of Opposition Mallikarjun Kharge chuan Prime Minister Narendra Modi chu a minister tena huatna tuha thu an veivir laia ‘ngawih’ chuh tlat tia puhin Mauni Baba (silent sheer) tiin a koh phah a. Hei hi rang taka chhanglet nghalin Vice President leh Rajya Sabha chairman Jagdeep Dhankhar chuan hetiang tawngkam hi Kharge te ang atanga chhuakah chuan a inhmeh lo, a lo ti a ni.
-- Advertisement --
Kharge-an Rajya Sabha-a minute 80 thusawina a neih chu treasury bench atang leh Dhankhar atangin lo tihbuai thin a ni a.
Thusawina a neihah Kharge chuan Rajya Sabha-a President’s address chhanletnaah sorkar chu titi tin leh sawihona tin te communal thila la lut veka puhin minister te chu huatna thehdarhtu tiin a sawi a.
“Prime Minister hi eng vanga ngawi nge a nih ka zawt duh a ni? Mi tin hlauhin i awm a, eng vangin nge i minister huatna thehdarhtute hlauha i awm loh?” tiin Kharge chuan a sawi a. “Prime Minister hian a minister te hi hau ngam se chuan inthlan lehah BJP ticket chan loh an hlauh dawn avangin an awm tha mai ang,” tia sawiin, “Eng vangin nge Mauni Baba a i tan tak daih?” tiin zawhna a siam zui a ni.
Kharge thusawi hi hnialin Dhankhar chu a inrawlh vat a, “I dinhmun nen a inmil lo. Tlang hraka sawi chuan, dinhmun thenkhat kan dah chungnung hi a awm a ni. December 8 khan he House-ah hian ka awm a, House leader, LoP leh PM lui pahnihin thu an sawi ang ka ti a, a hnuah rule book ka ennawn ang ka ti. Eng vangin? Heng mite hian dinhmun sang an chang bik a ni,” tiin a sawi.
Kharge thusawi chu Chair mai bakah BJP MP tena an tihbuai reng avangin Kharge chuan Parliamentary career hun rei tak a neih tawh tawp lamah tawng dan tur min zirtir in tum em ni a tihial bawk a.
Prime Minister anti-corruption slogan – Na Khaonga, Na Khane Dunga (chanpual ka la lo ang a, midang pawh an la lo ang) tih chu sawiin Kharge chuan, “Eng vangin nge Prime Minister hian thlanbik industrialist te chauh a duhsak?” a ti a. “PM Modi thian hnai ber ber te chu kum 2.5 chhungin an hausakna a let 13-in a pung tawh a ni. Kum 2014-a Rs 50,000 crore nei chuan kum 2019 ah Rs 1 lakh crore a nei tawh. Kum hnih chhung lekin Rs 12 lakh crore a hausak belhna magic a awm a, hengte hi inthianthatna duhsakna avanga thleng a ni,” tiin a sawi.
Kharge thusawi hian boruak siam halhin Dhakhar bawk chuan, “finfiahna awm lo puhna” sawi tur a ni lo, ‘insawichhiatna’ sawi ni lo a ti zui a. Leader of the House Piyush Goyal pawh inrawlhin ‘hausakna’ tia sawi hi market valuation mai a ni a, “Prime Minister leh Adani inzawm tia sawiin engmah behchhan a nei lo,” tiin a sawi.
Sorkar a beihna chhunzawm zui zelin Congress president Kharge chuan Hindenburg report chu chhui chian a phut a. “Prime Minister hian hlauh a nei lo a nih chuan Adani-Hindenburg buainaah eng vangin nge joint parliamentary probe neih a hlauh” tiin a sawi zui a. Kharge thusawi hian House buai nuai nuaia siamin treasury bench lam an lungawi lo hle a. Finance Minister Nirmala Sitharaman pawh inrawlhin Kharge thusawi chu Prime Minister mei nei taka tihna a ni a ti.
Hindenburg report chungchang chu hnawlin Vice President Dhankhar chuan, “Khawvel hmun danga random report te ring zel tur kan ni em ni? Ka rawtna chu, keimahni, kan chakna, leh kan institution-ah hian rinna nghat ang u,” tiin a sawi zui a ni.