Bawlhhlawh a kang leh ta…

Tuiriala Solid Waste Management Centre chu nimin khan a kang a, hei hi hal luih ni lovin bawlhhlawh inchhekkhawl nasa lutuk inup atanga methane gas insiam avanga kang ta niin sawi a ni a. Bawlhhlawh kang hi thelh tuma beih mek a ni a, mahse chuti maia thelhmih theih a la ni lo niin AMC lam hotu thenkhat chuan an sawi a ni.
Tuiriala bawlhhlawh paihna hluia bawlhhlawh paih a nih thin lai khan bawlhhlawh kha a kang reng mai a, bawlhhlawh kang khu kha englai mai pawhin a chhuak nguah nguah reng a. Bawlhhlawh kang kha thelhmih tumin nasa taka beih a ni thin a, mahse thelhmih theih a ni lo. A chhan pawh bawlhhlawh paih belh zel a nih avangin tihngaihna tak a awm lova. Ruahpuivanawn a sur pawhin mei kha a mit thei lo a ni.
Bawlhhlawh paihna kang khu-in Tuirial khuaa chengte tan harsatna namen lo a siam avangin court lamah zualko a ni nghe nghe a. Tuna Solid Waste Management Centre din a nih tak hnu hian bawlhhlawh paihna hluiah bawlhhlawh paih a ni ta lo va, englai pawha khu reng kha tunah chuan a lo reh ta a. Mahse, bawlhhlawh paihna thar lam a kang ve leh ta thung a. Bawlhhlawh paihna hlui leh a thar hi inhnaih tak, lung vawm phak leka hla a ni a. Hetianga bawlhhlawh kang hi a hmaa Tuirial mipui tibuaitu, Court lama zualko phahna hial a nih avangin, tuna bawlhhlawh kang leh ta pawh hian Tuirial mipui tan harsatna a siam leh thei dawn tihna niawm tak a ni.
Hmun danga keini aia bawlhhlawh ngah zawk khawpui lian tak tak ten bawlhhlawh paihna tikang lova an enkawl dan hi kan zir leh a ngai dawn niin a lang. A hma pawhin midangin bawlhhlawh an sawngbawl dan zirin official-te an fehchhuak thin a nih kha. Hetianga bawlhhlawh kang khu hi Pollution Control Board lam chuan an ngai serious viau thin nghe nghe a ni.