Bawlhhlawh khawn leh sawngbawl lama thawktute hriselna endik sak

Swachhata Hi Seva 2024 hnuaia faina beihpui thlak kalpui mekah Thawhtanni khan UD&PA department Lunglei hnuaia faina lama hna thawktu (sanitation worker) te hriselna dinhmun chu Health & Family Welfare (H&FW) department-in an endik sak.
UD&PA hnuaia faina lama thawktute hi mipui vantlang hnawmhnawk leh inchhung bawlhhlawh khawnkhawm a, a thehthang leh sawngbawl lam buaipuitu leh vantlang hmunhma thianfaitu an nih angin, bawlhhlawh nena inchiahpiah renga hna thawk an ni a. Fimkhur takin hna thawk mah se, natna hrik leh bawrhsawmna hrang hrang kai awlsamna hmuna awm an nih avangin an hriselna dinhmun ngaihven a tula hria in, Swachhata Hi Seva kalpui chhung hian an hriselna dinhmun endik tura ruahman a ni.
Thisensang, zunthlum, kawchhung pan/ lawng (ulcer), rannung seh (scrub typhus) leh sikserh (malaria) natna an vei leh vei loh endik niin, sakawr ek hrik (tetanus) hri danna pek nghal an ni.