Social media hman khawloh laka fate himna atan nu kan pawimawh – MNWF treasurer

Social media-a inchhirthehna leh tawngkam mawilo tak tak laka kan tu leh fate kawng dika hruai turin hmeichhiaten pawimawhna an nei thuk tih MNF Hmeichhe treasurer Prof. Irene Lalruatkimi chuan a sawi.
Thawhtannia MNF office-a inkhawmah MNWF hruaitu hian inchhungkhurah kan fate social media-in engti ang chiahin nge a khawih kan enpui a pawimawh hle tih a sawi. Technology khawvel, social media chak takin min awp behna khawvelah hian kan tu leh fate tan chhungkaw tina nute kan pawimawh em em tih inhriat thar a pawimawh hle tih a sawi.
“Smart phone hi ka khawih thiam tha ve tawh lo, ka hrethiam pha ve tawh lo, te pawh kan lo ti thin a ni maithei. Mahse, thu tha leh dik, kan tawnhriat leh kan lo zirchhuah tawhte, social media awm hmaa kan thil hriat hmangin kan tu leh fate fuih ngun a pawimawh. Nu dinhmun pawimawh zia leh chhungkuaah engtianga nasa in nge nu thusawi leh tawngkam hman tam hian inchhungkhurah leh tu fate ah hmun a luah tih hi research ang pawhin an lo nei tawh thin a. Hmun pawimawh leh thuk tak a luah a ni tih hi a result a ni zel,” a ti.
Social media-a sualna hrang hrangin min run mek lai leh politics-a tenawm taka inchhirthehna leh tawngkam mawi lo tak tak laka tu leh fate kawng dika hruai turin hmeichhiate chu siamthat hna thawktu an ni thei tih an hriat a tul tih Prof. Irene Lalruatkimi hian a sawi bawk.