Bawlhhlawh sawngbawl leh a kaihhnawiha hma latu office thenkhat leh Kolasiba tlawmngai pawl hrang hrang leh kohhran hruaituten Kolasib khawchhunga chak zawka bawlhhlawh thliarhranna kalpui leh vawikhawt hman plastic tih rem kawnga hmalak dan tur relin district bawrhsap John LT Sanga hoin Thawhtanni khan an thukhawm.
-- Advertisement --
Khawtlang inkaihhruai danah naupangten faina an seilen pui theih nan uar zawka bawlhhlawh thliarhran pawimawhna leh fai tura inzirtirna kalpui a tul tih sawi a ni a. District Urban Development Office leh District Education Office tangdunin Kolasib khawchhunga zirtirtute leh zirlaite tan ‘Workshop on Sewage & Solid Waste Management’ buatsaih tura rel a ni.
Rengtetlanga bawlhhlawh paihna hmun chu ram leilung tan a hrisel zawkna’n thla 4 ralhmaa hmang chhunzawm tawh lo tura thupek a awm angin, Solid Waste Management Centre Dihmuntlang ami chu awmze nei zawka hman a nih theih nan in tinah bawlhhlawh thliar ngaipawimawh tura inhrilhhriat a tul tih sawi a ni a. A hun leh hmuna bawlhhlawh paih lo leh thliar tha lo an awm chuan hremna kenkawh nise, an ti.
Fai tur chuan sawrkar hmalakna piahlamah khawtlang leh kohhran hruaitute an pawimawh tih sawi a ni a. Faina chu chhungkaw tin atanga intan tur a nih thu leh bawlhhlawh siam tlemna chu faina intanna a nih thu sawi a ni bawk.
Bawlhhlawh tawih theite chu hmunhma neite tan mahni in bulhnaia sawngbawl a nih theih nan DRDO BDO Thingdawl leh Bilkhawthlir hmalakna in compost pit siam dan ngaihtuah tura rel a ni a, a awmsate tangkai taka hmang tura zirtirna pek a tul thu sawi a ni.