Bawlhhlawh sawngbawlna hmun tur sak leh chatuan leimin tlawh

Lawngtlai district tana ruahman ‘Solid Waste Management System’ sak mek chu Thawhlehni khan bawrhsap Donny Lalruatsanga’n a enfiah.
Mipui mamwhna hria a, chak leh tha taka hnathawh bakah a hun taka zawh a tul tih bawrhsap hian a sawi a. Sawrkar hmalakna kawng hrang hrangah tha tak, rintlak leh huntiam chhunga zawh a nih theihnan contractor-te theihtawp chhuah turin a chah.
Solid Waste Management System Lawngtlai hi Urban Development & Poverty Alleviation department hnuaia sak a ni a, Rs. 6,97,70,000 senga sak tur a ni. Hna hi 2024 October-ah tan a ni a, kum hnih chhunga zawhfel tura ruahman a ni. Solid Waste Management System-ah hian Wet Waste Composting Centre, Dry Waste Composting Centre, site office cum staff quarters, sanitary landfill leh a dangte a awm dawn. KMMTP kawngpui Phaikhangmual-a awm niin, a sak hna thawktu hi Lalfamkima, Aizawl a ni a, tunah hian 80% zawhfel a ni tawh.
District Disaster Management Authority (DDMA) Lawngtlai chairperson ni bawk Donny Lalruatsanga kaihhruai hian DDMA member-te chuan Thawhlehni vek khan Kaladan Multi Modal Transit Transport Project (KMMTTP) NH-502 A kawngpuia ‘chatuan leimin’ tia sawi chu a hmunah an enfiah. Chatuan leiminah hian kumin bikah pawh vawi tam leimin vangin mipuiin harsatna an tawk tawh tih chairperson hian a sawi a. Khaw tam takin ei leh bar an lakluha leh sumdawnna kawngpui pawimawh a nih angin, kawng a tlang that a tul hle tih a sawi.
KMTTP kawngpui chu nakum maia hawn tur a nih angin, Minstry of Road Transport and Highways kaltlanga ‘repair & maintenance’ hna thawk tur company pawh tihfel tep a ni tawh a, thlan a nih hunah harsatna tam tak sutkian a ni dawn tih a sawi a ni.
PWD hotute sawi danin, chatuan lemin huamchin hi metre 400 vela thui a ni a, kumtin a thenfai hna an thawk thin. Kumin bikah tum 7 kawngpui tihtlang hna an lo thawk tawh a ni. PWD hotute chuan mipui harsatna sukiang turin an awm reng tih an sawi a ni.