Bawrhsap-in contractor leh a ruaitu NHIDCL lakah legal action lakah vau

erchhip district chhunga kawng siamtu zinga hna thawk tha lo contractor KRAM Infracon leh a ruaitu NHIDCL chu an laka legal action lak a tul maithei tih bawrhsap Paul L Khuma chuan a hrilh.
Serchhip district bawrhsap hian National Highway 02 siam hna thawktu KRAM Infracon Pvt. Ltd. lakah district administration an lawm lo takzet tawh tih a sawi a. Anmahni ruaitu NHIDCL pawh khakin, NHIDCL engineer-te enpuinaa kawng siamna lung tha lo lutuk KRAM Infracon-in a hmang thin leh DC Inspection Team leh MJA ten truck trip 5 an paihtir hial ngai khawpa a awm chu a thinrimthlak hle a, an hnathawh tha lo zarah NHIDCL pawhin an tuar ve thei tih a sawi.
An district-in kawngpui tha leh tlo an neih theihna tura theihtawp chhuah zel a tum thu leh a tul dan azira legal action la thei turin Legal Team din a nih thu a hrilh a ni.
District administration chuan NH 02 contractor-te kawng siam dan leh enkawl zui dan uluk takin a vil reng tih Paul L Khuma hian sawiin, kawng siam tha tawk lo awm avanga harsatna tawh a nih dan a sawi a. 2025 April atanga 2026 August 17 thlenga kawng siam chungchanga district administration hnuaia Monitoring /Inspection Meeting an lo neih tawh hrang hranga thu rel/ thu dah an lo neih tawh pawh sawiin, an district-in kawngpui tha leh tlo a neih theihna tura an hmalak tawhnaa Serchhip chanchinbumite, Sub Hqrs YMA Serchhip leh Joint VC ten an tawiawm thatnanaah lawmthu a sawi a. Defect liability period tlem la awmah kawng siamtu contractor-te vil a, kawng tha neih ngei tuma hma lakpui turin a chah.
Thudawn danin, Serchhip district-a NH-02 hi package thuma then niin, package-I Phulmawi leh Baktawng Mualkawi inkar km.5 siam hna thawktu Shivalaya Construction Ltd. hnathawh a tha thawkhat hle a; 2024 May 25 khan zo tawhin, kumin furah an kawng siam zaa 5 vel chiah thawmthat ngai a awm a, chu chu tha takin an thawmtha zo tawh.
Package-II Baktawng Mualkawi via Chhiahtlang leh Serchhip By Pass Road to Keitum inkar kawng siamtu KRAM Infracon Pvt. Ltd. hnathawh a chhe hle a, kumin fur chhoah an kawng siamsa zaa 80 aia tam mah thawmthat ngaiin a chhia a, an lung hman quality that tawk loh vang nia a lan thu sawi a ni. 2024 March 31 khan an hna an zo tawh a, defect liability period 2028 March 31 thleng an la nei a, hemi hunchhung hian an kawng siam chhia apiang an thawmthat a la ngai dawn.
Package-III Keitum leh Bungtlang inkar thawktu Bhartia Infra Projects Ltd. kawng siam a tha thawkhat hle a, kumin fur chhoah pawh sawisel tur leh thawmthat ngai a awm lo tih sawi a ni bawk.
Tunhnaia National Highway 02 thawmthat mek hi lirthei tana tlan hrehawm lutuk lo tura thawmthat lailawk (temporary) mai a ni a, September chho, ruahtui tla a ziawm hunah kawng chhe thawmna atana an lung hnawh hi haichhuah leh vek a, metal road pangngaia la siam leh tur a ni.