Bawrhsap-in khua a tlawh

Champhai district-a Vanzau, Zawngtetui leh Bungzung khua chu Thawhtanni khan district bawrhsap James Lalrinchhana’n a tlawh a, khawtlang hruaitute leh tlawmngai pawl aiawhte kawmin hmunhma pawimawh a tlawh a, khawtlang mamawh a hlan nghal a ni.
Bawrhsap chuan khawtlang mamawh a hmuna enfiaha zirchian a pawimawh thu leh khawtlang hruaitute nena sawihona in awmzia thui tak a neih theih thu a sawi a. Khawtlang hruaitute chu rualelna dik nei chunga tan la a, tun hun mai nilo hmathlir thui tak neia khawtlang mamawh leh tul ngaihtuah thin turin a chah.
Khawtlang hruaitute chu zirna dah pawimawh hmasa ber tura chahin, faina atanga intan hriselna ngaipawimawh a, ramngaw leh nungcha humhalh kawnga tan la zel a, ruihhlo laka thalaite fihlim theih nan sports hmanga chona siam tum turin a chah a. Thalaite khawvel hmabak eng siam tura tanho a pawimawh, tiin, information technology lama hmasawnna an inzir ve zel theihnan school zirtirtute leh khawtlang hruaitute chu theihtawp chhuah turin a fuih.
Bawrhsap hian Vanzau, Zawngtetui leh Bungzung leh a chhehvela hmunhma pawimawh, Health Sub-Centre, Govt. Primary, Middle leh High School, Anganwadi Centre, infiamna hmunhma, Community Hall, YMA Hall leh inkalpawhna kawng a tlawh a. Mamawh leh tulte khawtlang hruaitu – VC member leh NGO hruaitute a sawipui a ni.