Bawrhsap-in raltlan camp tlawh

Champhai district Melbuk ram, Tiau lui kama awm, Uilui kaia raltlan awmna camp chu Zirtawpni khan district bawrhsap James Lalrinchhana’n a tlawh.
District Level Committee on Myanmar and Bangladesh Refugees chairman ni bawk bawrhsap hian raltlante dinhmun chiang zawka hriat tuma tlawh a nih thu sawiin, nitin khawsak kawnga harsatna an tawhte a ngaihthlak sak. District Level Committee-in raltlante buaipui leh enkawl kawnga inkaihhruaina a siam chu Village Level Committee-in tha taka an kenkawh bakah raltlanten an zawm that a tul tih a sawi a. Sahimna zawnga India beltute chu ram dan leh inkaihhruaina siam bakah sawrkar thupek tha taka zawm turin a chah bawk.
Dan palzuttute lakah khauh taka hma lak zel a nih tur thu sawiin, inthununna tha tak nena chenho thiam tur leh dan loa che thinte do kawngah thuneitute tha taka thawhpui turin a chah a. Raltlan zingah a bikin hmeichhia, naupang leh rualbanlote himna sawrkarin a ngaipawimawh tih a sawi a ni.
Uilui kai refugee camp-ah hian chhungkaw 178 vel an cheng mek a. Bawrhsap chuan humanitarian organisation kaltlanga chhungkaw thlan bik 23 tana chhawmdawlna, dry food ration hrang hrang sem a nih dan a enpui. Hriselna, zirna, tui, ei leh in leh pawimawh dangte pawh sawiho a ni bawk.