NDA mi inti siin MNF-in Congress thawhpui leh si – MBJP president

MNF party-in NDA inti siin, Congress party a thawhpui thei tlat chuan party tum mumal nei tawh lo a nih zia a tichiang tih BJP Mizoram president Vanlalhmuaka chuan a sawi.
Zirtawpnia an party office-a inkhawmah BJP State president chuan NDA inti siin MNF party chuan Congress party a thawhpui thei tlat a, hei hian NDA tak tak a nih leh nih loh a tichiang, tia sawiin, “Tuna kan ram mamawh min pe theitu chu NDA a nih laiin, tualto party hlun tak MNF-in central-a party tluchhe mek a thawhpui duh hian party tum mumal nei tawh lo a nih zia a tarlang a ni,” a ti.
Tunlaiin restaurant changkang tak takah ualau taka zu zuar an awm thin thu sawi a ni tih sawiin, ZPM sawrkarin zu a zawrh ngam tak tak si loh laiin, ualau takin mipuiin zu an zuar leh si chu pawi an tih thu a sawi.
Tunhnaiah Union Home minister Amit Shah-a’n Telangana-a a thusawi, ‘Muslim an nih avanga reservation kan pe bik tur a ni lo,’ tia sakhaw duhsak bik BJP-in a duh loh zia a sawi chu, ‘OBC/SC/ST reservation hlip dawn anga kaihlekin social media-ah video thawndarh a ni tih Vanlalhmuaka hian sawiin, “Mipuiin thudik zawk kan ngaihthlak tam a, kan zawm a tul takzet a. Mi thusawi apiang awih mai lo tur leh, social media-ah pawh thudik lo thawndarh thin ten thawn darh loa, politics dik leh ram hmasawnna tur lam hawi zirtirna kan pek a tul hle a ni,” a ti.