Bawrhsap-in Zorinpui a tlawh

India leh Myanmar insumdawn tawnna hmun tura ruahman, Lawngtlai district huamchhunga awm Zorinpui chu Lawngtlai district bawrhsap Cheemala Siva Gopal Reddy chuan July 19 khan a tlawh a. Zorinpui atanga Paletwa kawngpui laih hna thawh mek enkawltu IRCON International Ltd hmalakna leh hnathawh chin a en.
Kaladan Multi Modal Transit Transport Project (KMMTTP) in Mizoram tana hmasawnna rahbi thar a thlen tur chu a taka hmuh a chakawm tawh tih bawrhsap hian a sawi a. He kawngpui zawhfel a nih chuan sumdawnna lian zawk kalpuiin, Lawngtlai bakah Mizoram hmun hrang hranga chengte tan hmathatna tam tak a thlen dawn a, chhungkaw tam tak tan eizawnna tha a siam dawn tih a sawi. Hmasawnna tluantling awm tur leh KMMTTP hlawkna tak tak tel turin a ram leilungfaten tun atanga rilru siam a tul hle tih a sawi bawk.
Hmasawnna hnathawh tam tak a hun taka zawh a ni lo fo chu pawi a tih thu a sawi a. A hun taka zo turin contractor-te an pawimawh rualin, mipui pawhin harsatna siam lo a, tha taka hna an thawh theihna’n thurualpui thiam a tul tih a sawi. KMMTTP zawh a nih chuan Lawngtlai chu ‘dry port’ tha tak a ni dawn tih a sawi a ni.
Bawrhsap hi IRCON International Ltd hotuten an lo dawngsawng a. Zorinpui atanga Paletwa inkar kawng, km. 109.2 hna an enkawlah an hnuaiah contractor 11 an awm a. Tunah fur ruahtui tlak tam lai a nih avangin hnathawh a chak thei lo tih an sawi. Helai bial Myanmar lama thuneihna kengkawh mektu – United League of Arakan (ULA) te nen thawhhona tha tak an nei tih an sawi a. Contractor-ten chak zawka hna an thawh zelna atan an mamawh power supply tha zawk leh thil tul dangte chu ngaihtuahpui an nih tur thu bawrhsap hian a sawi.
Zorinpui atanga Paletwa inkar kawngpui hi two lane tur niin, 2022 July 7 khan IRCON International Ltd (Ministry of External Affairs) chuan hna a tan a; 2026 January 6 a zo tura ruahman a ni. Kawng km.109.2 a thui bakah hian culverts, lei sei leh tawi, bus leh truck intawhkhawmna tur siam a ni dawn.