Bayern chakna Mueller ‘magic’

Parken Stadium-ah bench atanga khelmual lutin Thomas Mueller chuan Danish champion FC Copenhagen laka 2-1-a Bayern Munich chakna goal a siamchhuak a, he hnehna nen Bundesliga giants chuan khelh hniha point ruk neiin Champions League Group A table-ah hma an hruai.
Thawhlehni zan an group inkhel dangah Galatasaray chuan 3-2-in Old Trafford-ah mualneitu Manchester United hneh ve bawkin, Turkish club hian point li nen table-ah pahnihna luahin, point khat nei tawh Copenhagen hnuaiah point la hmu lo United-in a mawngphah an luah.
Denmark ram inkhelah kum 34 mi Mueller hian second hamf minute 77-ah khelmual lutin, substitute ve bawk Mathys Tel-a goal tur a chhawpsak a, Tel hian German club chakna goal a thun.
Bayern hian first half tawp dawnah target fuhin ball an thawnlut thei hram a, Copen-hagen tlarhnung khawng char bur an sutlang zo lo a ni ber a, ding lam leh vei lam sir atangin Kingsley Coman leh Leroy Sane hlauhawm viau dawn thin mah se Copenhagen defence an paltlang zo lo.
Second half tir lam minute 56-ah Bayern lamin Viktor Claesson-a shot hmunhimah an thawnlet zo lo a, midfielder Lukas Lerager chuan fing taka chet thawhin Danish champion hma-hruaina goal a thun theih phah.
Bayern Munich tankhawh hian minute 67-ah Copenhagen keeper Kamil Grabara ven goal-ah Jamal Musiala chuan mikhual siphurh sutna goal a khung.
1-1 a nih hnu hian Uefa Champions League match 144 a khelh tlinna ni turin Mueller chuan khelmual a lut a, Leon Goretzka tan siamsak nghal mah se Bayern midfielder hian goal pawnah a tauhchhuak hlauh.
Minute hnih a liam leh tihah Harry Kane-a tauhpial umin Mueller hian Tel-a goal tur a chhawpsak leh a, 2-1 hnehna nen German club-in an mikhual-na ramah point 3 an hlawhchhuak.
Inkhelh banah Bayern cap-tain Joshua Kimmich chuan Champions League group stage away-a match 18 chhung tlawm an pumpelh theihna kawngah an goalkeeper a fak a, bench lamah pawh quality player dah thei an nihzia a lang tih a tarlang tel.