Mizoram Super League bihchianna MSL Season X (March ni 11, 2025)

Mizoram Super League bihchianna
MSL Season X (March ni 11, 2025)
Mizoram leilung rap tawha basketball thiam bera mi tam takin an chhal, Ronald March Jr. kha Mission veng Vikings chahchhuah a ni a, kha mi tum MSL 3 (2017)-a a rawn khelh theihna tura sulsutu pawimawh em em chu tuna Chanmari BC neitu Pu Zothantluanga hi a ni.
‘Shabash…’ tiin Inter Village leh Inter CYMA (2005 leh 2006)-a champion kawp veng, Chamari hian Vikings mangthain Chanmari BC tih hming nen MSL X-ah hian an rawn inlan dawn – shabash…
Mission Impossible
Club ngialnghet leh a thlun zawm mihring tam tak Mission Veng Vikings, MSL 3 champion khan a nei a, tuna Chanmari BC puipate tho hi kha Vikings, MSL history-a hming dai tawh ngai lo tur buaipui thin hi an ni nawk – Vikings hming kha nawh reh a ni ngai tawh lo ang. Hmabak hlenchhuah theih loh a ni, Mission Veng Vikings hming phum bo chu!
“A lunglenthlak ve thin khawp mai, kan lo vahvaihpui rei ve hman viau a… Sulhnu duhawm tak thawhpuite nen kan lo hnutchhiah kha nghilh a har tawh ang,” tiin Vikings club puipa hlui, tuna MBBA secretary ni ta Pu Zomuanpuia hian a club hlui a thlah thu The Aizawl Post (Hoops Mania) a hrilh.
“Chanmari Basketball Club a lo nih tan hi nikum 2024 mai kha ni mah se Vikings basketball hun rei tawh tak din a nih atanga kal zel kha a ni a, lungrual taka hming thlak a ni ta!
Mission Veng Vikings angin MSL vawikhat champion a ni tawh a, Chanmari ang chuan team thar hlak a ni.
“Chanmari FC chairman Vanlalruatfamkima (Valpuia) hi co-owner angin a rawn lut thar a, club kan phur hle,” tiin Pu Reuben Lalchhandama, Vikings (head coach) anga MSL nomawi lo chawi tawh chuan a sawi bawk.
Hoops Mania thlirna
Head coach Nuna hi an veng tan leh a khelh tawhna club hrang hrang bakah coach anga hlawhtlinna a lo neih tawhte nge kan thlurbing ang, a player sulhnu ngah tak tak, khawi basketball court-ah pawh zahkai chin thiaute chungchang zawk hi ni ang – thurchhuah tur chanchin ngah ber club an ni hial mai thei.
Chuai hlei thei lo Michael F-a ball thiamzia leh nomawi nena inngheng reng an nih dan te, Dina tharum ngahzia leh team tana thawhhlawk dan te, Moses-a 3 pts. inghahna tham a nih bakah a D turu dan te, Big Mike thuam (fashion) nalh dangdai leh pawn lam theihnghilha basketball court chhunga a hahum (roar) tihbaiawm dan te, Vanlalmuana hming leh a shooting bawn theih dan te – hmunin min daih lo – shabash!