Bayern Munich dinhmun him lo thar leh
A zawna Bundesliga title vawi 11 lak tlin tuma bei mek Bayern Munich chu Inrinni zan khan an mikhual RB Leipzig lakah 1-3 ngawtin an tlawm a, nizan result tarlan hman loh pakhatah Borussia Dortmund-in mualneitu Augsburg an hneh a nih chuan league table-ah Bavarians hi lehpelin, point hniha sang zawk chungin season tawp ni an nghak thei tawh ang.
Allianz Arena inkhelah first half minute 25-a Serge Gnabry goal hmangin mualneitu team-in half-time thlengin hma an hruai a; top flight table-a pathumna luahtu ni mek Leipzig erlet tan second half tir lam minute 64-ah Konrad Laimer chuan mikhual team siphurh a sut zet a, a hnuah Christopher Nkunku leh Dominik Szoboszlai-te’n penalty atangin Leipzig chakna goal an chhuihlut ve leh a, he thu buatsaih laia an dinhmun hriat hman loh Edin Terzic-a team Dortmund an phur thar ve leh!
Thomas Tuchel-a team Bayern Munich hian season tawp ni inkhel pakhatah Koln an luhchhuah ang a; nizana Augsburg hmachhawn Dort-mund hian Augsburg hnehin, kartawp final day-a an mikhual tur Mainz an hneh bawk chuan kum 2012 hnu lama a vawikhatna atan German top flight title an chang tawh ang.
Bayern Munich hnehtu Leipzig tan pathumna a chiang ta a, season tharah pawh Champions League football an khel leh thei dawn a ni.
Bayern Munich dinhmun him lo thar leh
Get real time updates directly on you device, subscribe now.
Prev Post