Bayern Munich in Palhinha an la lut
German club lian Bayern Munich chuan Fulham atangin Portugal midfielder Palhinha an la lut a, kum 2028 thleng an hnena cham turin contract an ziahpui.
Bundesliga-ah champion leh ngei tuma tan khawh Bayern Munich hian Fulham hnenah Palhinha man atan £42.3m an pe phawt a. An hnena a khelh that dan a zirin £4.2m an pek belh leh ang. Allianz Arena-ah kum 2028 thleng cham turin contract an ziahpui a, Palhinha contract rei zawng hi kum li tihna a ni. Palhinha chuan Europe-a club lian leh ropui ber pawl Bayern Munich a zawm thei chu a hringnuna a hlim lai ber a ni thu a sawi.
Portugal midfielder Palhinha hian kum 2022 khan Sporting Lisbon atangin EPL club Fulham a zawm a, Fulham hian Palhinha manah hian £17m an seng. Fulham tan a season hmasa berah a chetha nghal viau a, Fulham player of the season a ni nghal der. Fulham tan season hnih a khelh chhungin vawi 79 a khel a, goal riat a thun.
Bayern Munich hian England captain Harry Kane an nei mek a, Fulham atanga Palhinha an lak luh hma hian Crystal Palace winger Michael Olise an lo la lut tawh a, Tottenham atanga an hawh English defender Eric Dier pawh a nghetin an la la lut tawh bawk. EPL a chetha player an la lut zawn a, an team an thuam thar mek. Bundesliga-ah vawi 11 zet an champion hnua champion zo ta lo Bayern Munich hian 2024-25 season ah champion ngei tumin tan an khawh nasa hle