Bayern tan league title la hmin zo lo

Siruk fai tehrenga an mikhual FC Schalke 04 sawpin Inrinni zanah Bayern Munich hmahruaina a nghet leh sauh a, mahse, inkhel dangah table-a an hnuai chiaha pahnihna luahtu Borussia Dortmund an chak ve leh rih avangin Bavarians tan Bundesliga title a la hmin zo mai lo!
Allianz Arena inkhelah Bayern player hrang thiau parukin goal khat den den an thawh a; chechhuak hmasaber veteran forward Thomas Muller chuan starting line-up a luahkir leh zan minute 21-ah goal hmahruai thawhin, darkar chanve khelh tlin dawnah penalty atangin Joshua Kimmich chuan a belhchhah a, half time-ah mualneitu team-in sihnih faiin hma an hruai phawt.
Second half tir lamah Serge Gnabry chuan Bayern goal thumna thunin, minute 65-ah a goal hnihna a thawh zui leh a; mualneitu team goal hnuhnung pahnih hi Mathys Tel leh Noussair Mazraoui-te thawh a ni ve leh.
Khelh hnih chiah awm tawhah Bayern hian point khatin anhnuai chiaha pahnihna luahtu Dortmund an kalsan chhunzawm zel a, title race-a an elpui awmchhun hian tha an thlah duh bik loh avangin Munich hian season tawp ni annghah thlen law law a ngai dawnte pawh a ni mahna!
Borussia Dortmund hian Inrinni Bundesliga inkhel dangah 5-2-in an mikhual Borussia Monchengladbach an sawp a, inbeihnaah an tawpsan duh bik rih lo!
Kartawp Pathianni zanah Bayern hian RB Leipzig an mikhual ang a, hemi zan vek hian Dortmund-in Augsburg an luhkhung ve bawk ang.