Spain leilunga vawihnih chak India U-17 football team
Mizo hnahthlak midfielder pahnih – Lalpekhlua (Bengaluru FC U18) leh Vanlalpeka Guite (Aizawl FC U18) bakah forward Thanglalsoun Gangte (Sudeva Delhi FC U18) telna India U-17 men’s national team chuan AFC U-17 Asian Cup Thailand 2023 inbuatsaihna kal zelah tunlai hian Europe an hrut mek a, karliamta Zirtawpni khan Spain leilunga an tour bik zoin, training game ruk an khelhah vawihnih chakin, vawithum an tlawm a, draw vawikhat an nei.
Chhuak hmasa lama tarlan tawh angin, Spain ramah hian Spanish club lian palite age group team an infiampui a; an match hmasaberah April ni 19 khan Atletico de Madrid U-17 team chu 4-1 tehrenga sawpin bultanna tha an hlenchhuak phawt.
April ni 25 khan CD Leganes U-18 team lakah sihnih faia tlawmin, April ni 27-ah 2-1-in Atletico de Madrid U-16 team an hneh leh a; May ni 3-ah Real Madrid U-17 team nen sithum ve ve thuna inhnehtawkin, May ni 10-ah Getafe U-18 team chuan 3-1-in Blue Colts hi an hneh a; karliamta Zirtawpni khan Spain leilunga inpuahchahna game hnuhnung ber khelin, Alcala De Henares khelmualah Atletico de Madrid U-18 chuan India rawltharte hi sili faiin an sawp.
Iberian Peninsula lama inbuatsaihna game hnuhnung ber an khelh zawh rualin India U-17 men’s national team hian Europe-a inbuatsaihna chhunzawm turin Germany lam an pan zui leh nghal.
Spain rama an game hnuhnungber an khelh hma lawkin India head coach Bibiano Fernandes chuan Spain rama an sulhnu chu a tha zawnga chhui theih a nih thu leh result tha tak an neih thu a sawi a, Atletico Madrid U-18 team laka an last match pawh a naute tana tawnhriat tha tak petu tur a nih thu sawi chungin Getafe game kha an tumpuite ruakhau leh thahrui ngah avangin game hautak a nih thu a sawi.
Duhthusam result nei diak diak lo mah se khati ang game harsa tak tak kha a naute tana zir tur titamtu a nih thu leh an aia player hraw leh hruanghrau zawkte hnen atangin a naute’n zir tur tam tak an pawchhuak tih a sawi a, chak leh tlawm chu football-a bet tlat a nih thu leh an game hnuhnung bera Atletico an sut turah result tha zawk an beisei thu a sawi a, mahse, 4-0 ngawtin an tlawm zui leh ta tho a ni.
The Blue Cubs hian Spain rama an cham chhungin Madrid khuaa Atletico de Madrid hmunhmaah training an kalpui a, an cham chhungin La Liga match pakhata Atletico-in 2-1-a UD Almeria an hneh lai a hmunah an en nghe nghe.
Thailand rama AFC U-17 Asian Cup khelh turah India hi Group D lamah Vietnam (June 17), Uzbekistan (June 20) leh Japan (June 23) nen an insu dawn a, India match-te hi Pathum Thani leh Bangkok-a khelh tur a ni ang.
-- Advertisement --
India U-17 team squad
Goalkeepers: Sahil, Julfikar Gazi, Pranav Sundarraman.
Defenders: Ricky Meetei Haobam, Surajkumar Singh Ngangbam, Manjot Singh Dhami, Mukul Panwar, Malemngamba Singh Thokchom, Pramveer, Dhanajit Ashangbam, Balkaran Singh.
Midfielders: Vanlalpeka Guite, Danny Meitei Laishram, Gurnaj Singh Grewal, Korou Singh Thingujam, Lalpekhlua, Rohen Singh Chaphamayum, Omang Dodum, Faizan Waheed, Akash Tirkey, Prachit Gaonkar.
Forwards: Thanglalsoun Gangte, Shashwat Panwar, Gogocha Chungkham, Lemmet Tangvah.