BCM-in hlemhlet do lamah chak zawka hma lak a tum
Baptist Church of Mizoram chuan hlemhletna do kawngah chak zawka hma lak a tum a. Ruihhlo nghei tum, centre atanga chhuak tawhte enkawlna tur din a tum bawk.
Mizoram Baptist Kohhran Rorelna sang ber, Assembly vawi 130-na chu March 4-8 chhung khan BCM Lunglei Bazar Veng Kohhran biak inah neih a ni a. Thurel zingah – corruption do kawnga chak zawka hma lak; ruihhlo nghei tum, centre atanga chhuak enkawlna tha an dawn theihnan ‘Halfway Home’ din; kohhran dana inneihna chu mitinin an tlin theihnan a hautak lo zawnga buatsaih tura inhrilh thar; kohhran mi politics-a inhmangte laka BCM-in beiseina a neih dan chungchangah Administrative-in ennawn a, Assembly Executive Committee-a thlen leh; BCM office-a artificial intelligence hman tangkai, tih a tel.
Hei bakah hian, BCM hmalak mekna – ‘ruihhlo do’ chu kum 2026- 2027 a chhunzawm; BCM-in Pathian thuzirna in a neih AICS hmasawn zelna tura chak zawka hma lak; BCM-in certificate a neih (Inneih, Nau hlan, Baptistma) re-issue leh original hriathranna atan certificate-a coding siam; Mizoram Baptist Kohhran tawngtai hruaina bu-ah ‘Krista tana tuartute tan’ tih leh ‘Ruihhlo ngaite leh a zuartute tan’ tih dah belh; BCM missionary leh a ram mi thawktute rawngbawlna avanga court case neite tanpui dan provision siam; BCM Old Age Home din rawtna zirchian a, Assembly Executive Committee-a thlen, tih pawh a tel.
Rorel inkhawm hi president thar Rev. Prof. R .Zolawma’n a kaihruai a, president elect atan Rev Dr R Lalthanmawia thlan a ni. Kum 2026- 2027 atana sum hmuh tura ruahman chu cheng nuai 14364.95 a ni.
Pathianni chawhma inkhawmah pro pastor 9 chu minister atan nemngheh an ni a. Pro pastor ni lo minister pahnih nemngheh an ni bawk. Kum 2027 Assembly chu BCM Zotlang Serkawnah nghah a ni a, kum 2028-ah BCM Zobawk Ebenezer-ah nghah a ni ang.
Statistician report-in a lan danin, Mizoram Baptist Kohhran hnuaiah member 186772 awmin, kum hmasa aia member punna chu 2332 a ni. BCM hnuaiah hian ABC 17, Pastor bial 95 leh tualchhung kohhran 711 an awm a ni.
Pathianni zan inkhawmah president kal chhuak Rev Dr C Vanlaldika’n “Thupek zawm malsawmna” tih thupui hmangin thuchah a sawi a ni.