Mizoram sawrkar ruahmanin February 20 atang khan kuthnathawktute sawhthing thar leisak tan a ni a, a ni khatnaah hian hriat theih chinah quintal 7800 chuang lei a ni. Mizoram Agriculture Marketing Board (MAMB) chairman, Agriculture minister PC Vanlalruata chuan sawhthing lei tuma ruahmanna an siam chu an beisei aiin a kaltluang a, a ni khatnaah hian lei an tum zat aia tam daih an lei, tiin The Aizawl Post-in a zawhna a chhang. Lo cho lawk an tam avangin kan beisei aiin kan la hnem a, tun kar chhung vela lak kan beisei kha vawiin (February 20) hian kan la nghal a, Secondary Collection Centre-a cluster enkawltute azirin tun kar chhunga lei zawm zel dan tur chu a innghat rih dawn tih a sawi a ni.
“Cluster azir zelin a ni khatna atana an target la zo nghal an awm maithei a, chutihrualin, target la la zo lo an tam a; thenkhat chu kar thar atanga lei/ buk tan chauh tur pawh an awm a, an cluster huamchin zela an lo lak dan azir kha a ni mai,” minister hian a ti.
MAMB chairman sawi danin, Ningani bikah hian Secondary Collection Centre (SSC) 40 velin sawhthing an buk tan a, hemi tlai dar 5.00 vel thleng khan quintal 7879 lei a ni tawh. SCC thenkhat chu vawiin, February 21-a tan tur leh karleh kartir lama bul tan tur an awm tih a sawi a ni.
Sawhthing man hi SCC atanga phurh chhuah a nih atanga ni sarih chhunga tihfel hman tum a ni a. District Agricultural Marketing Committee (DAMC) atangin farmer tin hnenah direct beneficiary transfer (DBT) hmanga pekchhuah an ni dawn tih a sawi bawk.
Mizoram Agricultural Marketing Board-in a ruahman angin, Mizoram sawrkar “Bana Kaih” hnuaia thlai thar lei tur pali zinga pakhat – sawhthing hralh leh lei runpui hi neih tan a ni a. Secondary Collection Centre ruat lawkin anmahni huamchhunga an ruahman ang zelin sawhthing hi lei a ni ang. A thawhkhatna siam a ni a, district hrang hrangah March an chuangkai fur dawn a ni.
Sawhthing hi kg khat Rs. 50-in sawrkar chuan a thartute a leisak dawn a, a aia toa hmun danga hralh duh tan SCC kaltlang khera hralh chhuah a ngai lo thung.
Beisei lawk aia tam sawhthing lei nghal
Get real time updates directly on you device, subscribe now.
Prev Post