Thluak tana chawtha bawnghnute

Thluak tana chawtha bawnghnute
Mithiam ten zirchianna an neih hnuah bawnghnute in hnem leh bawnghnute atanga thil siam ei hnem ram te chuan khawvela mi thluak tha te chawimawina sang Nobel Prize dawng thei an ngah bik niin an sawi tlat mai.
New England Journal of Medicine-in mithiam te zirchianna chungchang a tarlan danin chocolate ei hnem ram ten Nobel laureate an ngah an ti a, chocolate-a flavoniod awm chuan thluak a tichak thei a nih an ring. He an thil hmuhchhuah hian ngaihtuahna dang neih tirin, chocolate chu bawnghnute nena chawhpawlh a ni fo si a, chuvangin bawnghnute chu a pawimawh zawk lo maw? tih ngaihdan an nei ta a ni.
Mithiam te chuan Food and Agriculture Organization data atanga enin, ram 22 a kum khata mipakhatin bawnghnute a ei hnem dan (per capita milk consumption) leh chu rama Nobel laureate an tam dan chu an teh ve leh ta a ni.
Sweden chu Nobel laureate ngah ber an ni a, mipui maktaduai 10-ah mi 33-in Nobel Prize dawng ang an ni a, bawnghnute ei nasa ber ram an ni bawk a, mi pakhatin kum khatah bawnghnute Kg 340 vel ei ral ang an ni.
Switzerland chu pahnihna niin, mi maktaduai 10-ah mi 32-in Nobel Prize dawng ang an ni a, anni pawh bawnghnute ei nasa ram niin, kum khatah mipakhatin Kg 300 vel ei ral ang an ni.
China chu mihring tam dan atanga teha Nobel laureate nei tlem ber a ni a, zirchianna atana an hman ram 22 zingah China chu bawnghnute ei tlem ber ram a ni. Chinese pakhatin kum khatah bawnghnute Kg 25 vel ei ang an ni.
Bawnghnute chu a tha tak tak reng em ni? Vitamin D a pai hnem a, chu chuan thluak a tichak thei niin an sawi. Tichuan, Nobel Prize dawn i duh chuan chocolate leh bawnghnute ei hnem mai rawh le!
He zirchianna chungchang hi journal Practical Neurology-ah tarlan a ni.