Beisei phak lohvah Thangkura

Mizo zingah ‘Thangkura’ tih hming hre lo an awm ang em aw? |hangthar zelte pawhin an hria a, an la hre zel dawn pawh a ni mai thei.
B Lalthlengliana a ni a, drama-ah Thangkura hming a pu thin. Kar lovah chu hming chuan Zoram kil tin a dengchhuak a, naupang inkhualtelem thlengin Thangkura lem an chang thin.
B Lalthlengliana hian Thangkura thlen chin hi a beisei phak bak a nih thu a sawi a, hetiangin mipuiin an drama an lo ngaina ang tih a beisei phak loh thu a sawi. Tun hnaiah chawimawina sang Sangeet Natak Akademi a dawng a, hei pawh a beisei phak ngai loh a nih thu a sawi.
Sangeet Natak Akademi hi rimawi, lam, drama lamtea India ram chawimawina sang a ni a, February ni 23 khan Delhi-ah India president kut atangin a dawng a ni.
He award hi folk theatre lama a thawhhlawk vanga dawng a ni a, “Hetiang hi ka beisei lo, ka beisei phak loh thil a ni. Ka’n dawn takah hian mithiamte’n a ropuizia te min hrilh a, a ropuizia pawh ka hre ve chauh alawm,” a ti.
1979 November ni 29-ah R Vanlalzauva leh K Lalchhanhima nen, an pathumin Biate-ah drama an chang a, man chawi lovin mipuiin an en. A entute chuan hmuhnawm an ti a, man chawia en an duh thu te an sawi ta hial. An chhunzawm ta zel a, chu chu Thangkura Drama Party lo pian dan a ni.
A tirah chuan Thangkura hming hi an hmang lo a, an drama hmasa pawh ‘Chhiahhlawh chhaw’ tih a ni. Kum khat vel hnuah Thangkura hming hi an phuah ta a, a anpui awm lo thei tur ber a ni ang tiin he hming hi an chher chawp.
A din tirh atangin he party hi a hlawhtling nghal a, Zoram hmun hrang hrangah an drama hi a lar. Audio cassette-in a ngaihthlak theih a, drama 20 an buatsaih. A cassette a lei theih bakah hmun hrang hrangah zinin an chang thin bawk.
Thangkura Drama Party hi an hun laia Zoram mipuite tihlimtu an tling a, an drama hi fiamthu lam ni mah se thuken a nei thin. “Vawiin thleng hian mi hmaa dinga thusawitute’n an drama-a kan thil sawite an sawi chhawng tih te kan lo hre thin a, hei hian min tilawm khawp mai,” B Lalthlengliana chuan a ti.
“Miin kan drama, kan fiamthute an lo hlimpui hi ka lawm, hei hian min tihlim. A tirah hetiangin an hlimpui ang tih pawh ka beisei pha lo kha a ni a, rin phak bakin miin an lo hlimpui a, hei hian min tihlim tak zet a ni,” a ti bawk.
Hetianga fiamthu leh drama lama a inhmang hi hma a sawn phah tih a sawi a, “Mi zakzum ka ni a, kimki chawih chawih khawpa zakzum chu ka ni lo a, mahse mi zakzum, ka tih tur chu tih ve hram hram thin ka ni. Hetianga fiamthu lama ka inhmang hi hma ka sawnpui a, ka lawm khawp mai,” a ti.
“Zak chung chunga kan tih a tul chang a awm a, nuam lo ti riau chunga mipui hmaa inlan te pawh a ngaih chang a awm. Chutiang chunga kan lo ti hram hram thin kha hma ka sawnpui khawp mai,” a ti bawk.
Tun hnaia a award dawn Sangeet Natak Akademi hi 2020-a dawng tur a ni tawh zawk a, mahse Covid-19 hrilengin a tihbuai avangin, 2019 hnu lama award dawng tura thlante chu kumin February ni 23 khan an hlan ta a ni.
“Hetiang award ropui ka dawng ve hi ka lawm khawp mai. Ka beisei ngai loh thil a ni,” a ti.