Bench press record siam tum

Bench press record siam tum
Kum 70 mi a ni tawh nain, body building lam a la tuipui kawp mai a, chawlhsan a la tum lo nasa, June ni 14, 2025-ah kum 71 a tling dawn a, a pianchamphaah hian bench press record siam a la tum. Guinness World Records hian kum 71 tling china bench press record hi an la nei ngai lo a, mahse, tunah hian GWR-in record siam a dilna an pawm sak tawh a ni.
A hming chu Phillip Hambrick a ni a, Georgia., USA a cheng niin, Army helicopter pilot atanga chawl tawh a ni a, a kum 71 tlin champha lawm nan pound 350 (Kg 158.750) bench press a tum. Bench press chu rit chawi hmanga exercise lak dan chi khat a ni a, YMA tutthleng ang deuha zangthal zawnga muin, thir tlawn, a hmawr tawnah thil bial rit an dah an chawi thin ang hi a ni. An rit chawi laiin an kiuah ban titawmin, an awmbawr thlengin thir tlawm chu an tihniam a, chumi hnuah ban an timar leh thin.
GWR hian kum 71 tling chin zinga benc press rit thei ber record hi la nei ngai lo mah se Rudy Kadlub, kum 71, chuan IPL Drug-Tested North American Championships, United States Powerlifting Association-in San Diego-a an buatsaihah pound 303 (kg 137.440) a rit a bench press thei a, world record a siam.
GWR-in record an neih laia bench press rit thei ber chu Blaine Sumner, kum 37, niin, ani hian pound 885.2 (kg 401.5) a bench press thei.
Phillip Hambrick hian kum naupang zawkte chophur nan nan leh kum lama naupang zawk ten an hriselna vawn that kawnga harh tharna an neih theih nan bakah eng anga kum upa tawh tan pawh exercise lak theih reng a ni tih tarlan a tum niin a sawi a, “Awm mai mai lovin, che tam la. Ei leh inah fimkhur la. I taksa vawng tha rawh. Damrei i duh chuan damreina tura i tih turte i ngaihpawimawh a ngai a ni,” a ti.