Chhuna darkar khat vel mut kan chin chuan type-2 diabetes warning sign niin mithiam ten an sawi. Japanese mithiam ten mi 3,00,000-a zirchianna an neih atanga an hmuh danin, chhun mut ching te chuan type-2 diabetes risk hi a mu ngai lo te aiin an nei sang zawk niin an sawi.
UK-a mithiam te pawhin chhuna mut chhuak tlat thin hi natna eng emaw neih rûk vang emaw diabetes vang emaw a ni thei niin an sawi a, mahse, chhun mut hian diabetes risk a tisang tih tihchianna engmah a awm lo an ti ve thung.
University of Tokyo-a mithiam ten zirchianna an neihah chuan chhuna minute 60 mut chin hian type-2 diabetes risk hi chhun mu ve ngai lo te aiin 45% thlengin a tisang thei niin an sawi ve thung.
Zirchianna neitute chuan chhun mut chin hi zan lama mut kham tawk loh vang te pawh a ni thei a, chu chuan type-2 diabetes bakah heart attack, storke leh lunglam natna chi hrang hrang leh metabolic disorder risk te pawh a tisang thei niin an sawi. Zan mut kham loh leh kan hnathawh dan kalhmang leh kan nunphung avang te pawhin type-2 diabetes risk hi a sang thei niin an sawi bawk.
University of Glasgow a metabolic medicine-a professor Naveed Sattar chuan, “Diabetes risk tisangtu hian chhun mut a tichhuak te pawh a ni ve thei tho bawk. Sugar level a sang deuh hlek pawh a ni thei a, chuti a nih chuan chhun mut hi diabetes warning sign tihna a ni,” a ti.
University of Oxford a cancer epidemiology unit a mithiam Dr Benjamin Cairns chuan he zirchianna atanga an hmuhchhuah hi uluk taka enzui a ngai niin a sawi a, “Observational study atang ringawt hi chuan thutlukna siam mai theih a ni lo, a chhan chu an thil hmuhchhuah te a chhan leh vang sawifiah a harsa thin,” a ti ve bawk.
He zirchianna chungchang hi European Association for the Study of Diabetes-in Munich-a meeting an neihah chhawpchhuah a ni.
(THE AIZAWL POST – Phuah Pawlh)
Full>> ePaper Subscribe
