Bengali tawnga zir thinte’n A AW B zir tha leh

Myanmar-a kawl tawnga lehkha zir thin raltlan
naupangte’n Mizoramah A AW B an zir tha leh a, Bangladesh-a Bengali tawnga lehkha zir thin raltlan naupangte pawhin A AW B an zir tha leh mek.
Lawngtlai district-a Parva III khuaah Bangladesh atangin raltlan engemaw zat an awm a, naupangte pawh sikulah kalin lehkha an zir. Bangladesh-ah Bengali tawngin lehkha an zir a, Mizoramah sikul an luh avangin A AW B an zir leh hlawm.
Govt Primary School, Parva III-ah Bangladesh-a Chittagong Hill Tracts atanga Mizorama tlanchhia naupang 57 an lut a, a khaw mi aiin an tam zawk. Mizo medium a ni a, A AW B te an zir that leh a ngai.
KG atanga pawl 4 thlengin an awm a, pawl 3 leh pawl 4-ah pawh raltlan naupangte hian A AW B an zir tha leh.
“KG-ah chuan a khaw mi pawhin A AW B an zir hrim hrim a ngai a, mahse kan raltlan naute hi chuan pawl 4-ah pawh an zir tha leh,” an headmaster Lalbuka chuan a ti.
A B C pawh an zir tha leh tih a sawi a, an khuaa an pawl aia hniamah an awm tlangpui tih sawiin, pawl 5 te pawh pawl 3-ah an thu a ti a, Bangladesh-ah hian Bengali tawnga an zir avangin A AW B chauh ni lovin A B C pawh an zir that leh a ngai tih a sawi.
“An fel a, amaherawhchu, thil buaithlak a awm a; KG-ah chuan a khaw mite nen A AW B an zirho mai a, a chung lamah hian an thiante’n A AW B an thiam tawh a, chutiang a nih laiin raltlan zirlaite hi zirtir an ngai si a, pawl khatah pawh an zir a inang lo ta a, zirtirtute tan a buaithlak khawp mai,” Lalbuka chuan a ti.
Raltlan naupangte hian sikul atangin zirlaibu an dawng a, BSF-in lehkhapuan leh bag an pe. Mid day meal pawh an dawng a, dailuah leh artui an dawng thin.
“An fel a, thu an awih a, chutih rual chuan fuih ngai te pawh an awm ve a,” an headmaster chuan a ti a, “Khu lama an zirlai leh zir dan nen a lo inang lo a, thil buaithlak neuh neuh chu a awm,” a ti bawk.