Bengdar mamawh hnena pek dan tur rel

Mizorama beng tha lo leh ri hriatna lama harsatna tawkten a thlawnna bengdar (hearing aid) an dawn theihna turin larsap Dr Hari Babu Kambhampati chuan Deen Dayal Sravana Foundation (DDSF) a ko lut a. He hmalakna bawhzuina atan Nilaini khan Raj Bhavan-ah larsap kaihhruaiin DDSF hotute leh Health department bakah Social Welfare & Tribal Affairs department hotuten thawhho dan tur an sawi.
Larsap chuan DDSF hmalakna sawiin India hmun tam takah beng lam harsatna neite zawn chhuah leh a thlawna bengdar pek kawngah hna ropui tak an thawk mek tih a sawi. DDSF hian company liante dawrkualin beng lama harsatna tawkte tan an mamawh – hearing aid leh device leina tur corporate social responsibility fund a hmuhsak thin. Mizoramah pawh beng lama harsatna nei tam tak an awm a, heng mi vanduai, tanpui ngaite hian a thlawna beng dar an neih theihna turin DDSF chu an inhuam tih a sawi a ni.
State Health department leh SW&TA department ten beng dar vuah mamawhtu zawnchhuah kawngah an puih erawh a ngai tih a sawi a. He thawhhona hi harsatna a awm loh chuan a ranglama kalpui nghal theih a ni. A thawhkhatna atan zirlai LKG atanga college inkarte chu ngaihpawimawh a ni a, chhinchhiah bik nise tha a tih thu a sawi bawk.
DDSF hotute chuan beng dar vuah ngaite zawnchhuah kawngah state sawrkarin statistics mumul tak a neih sa chuan hun reiloteah hna an rawn tan thei tih an sawi a. State sawrkar atanga document an mamawhte chu screening report, Aadhar leh ration card tih an sawi a ni. A thawhkhatnaah zirlaite ngaihpawimawh hmasak nise an duh thu an sawi.
Mizoram sawrkar aiawhte chuan a thlawna bengdar dawng duh leh mamawh Mizoramah tam tak an awm mek tih an sawi a. District tin deuhthawah audiologist leh audiometric assistant an awm. Screening kalpui thin niin, tunah hian mi 100 chuang hearing aid mamawh an awm mek tih an sawi a. Tuna an chhinchhiah zat aiin bengdar mamawh an tam tih sawiin, a hranpaa screening camp buatsaihin a neih theih tih an sawi bawk.