MNF ni lo Congress ni lo sawrkar siam duhna a lian – ZPM leader

Mipui rilru ah MNF ni lo Congress ni lo sawrkar siam duhna a lian hle tih ZPM leader Lalduhoma chuan a sawi.
Dampa bial Pukzing leh Silsuri khuaa ZPM-in vantlang inkhawm an buatsaihah Lalduhoma chuan mipui nawlpui titi ah ZPM a sawrkar dawn an ti tawh nia sawiin, “BJP hian sawrkarna an siam mai dawnin a lang loa, mipui rilruah MNF ni lo Congress ni lo sawrkar thar siam duhna a lian hle,” a ti.
Sawrkarna an siam thei a nih chuan chuan ramri hrula awmte hmasawnna an ngaipawimawh dawn a. Thenawm ramten ramri-ah kawngpui tha tak an neih tawh laiin Mizoram sawrkar chuan kawng a siam duh loa, a chhe em em niin a sawi. Bangladesh nen insumdawn tawnna tur ruahmanna tha tak an siam dawn niin a sawi bawk.
Mizoram leh Bangladesh insumdawn tawnna tha tak an siam thei a nih chuan, Mizoram tan chauh ni lo India ram tan pawh a chhenfakawm dawn a, a zar zo ber tur chu ramria awmte an ni dawn tih ZPM leader hian a sawi a. ZPM hand holding policy nena kalkawpin hmasawnna ruhrel lian tak din theih ngei an inbeisei tih a sawi a ni.
ZPM chuan hna hmasa berah thil pali – sawhthing, aieng, hmunphiah leh hmarchate an lei dawn a. Hmunphiah bikah mahaldar-ten an duh dan dana an leisak thin chu siamthat an duh a, sawrkarin rate a duang anga, mahaldar system tih bo an duh tih a sawi. “Kan ram thanmawhbawk lian tak eirukna laka fihlim tura intiam chief minister leh MLA rual kan mamawh a, chumi laka fihlim ngam tur hruaitu tha leh team tha tak Pathianin min pe niin kan hria a, kan lawm hle,” a ti.