BER TI NA NA NA

Rempuia R. Lutmang
Thil kan tehin kan teh azirin a sawi fiahna tawngkam chi hnih kan nei, chu chu ‘zawk’ leh ‘ber’ a ni (“zawk leh ber an ni” tih loh tur, thil nung ni loah ‘an’ hman loh tur, thil nung ang ziazanga sawi tum erawh chu a awm thei, chutiangah chuan a dan a dang ve deuh ang chu).
‘Zawk’ hi thil pahnih khaikhinaah kan hmang a; ‘ber’ hi chu pathum leh aia tamah tawh phawt chuan a hman theih vek. Pahnih aia tamah chuan a chungnung ber a awm thei a, a hnuaihnung ber a awm thei bawk.
A chungnung berah hian inang chiah pahnih a awm thei, a aia tam pawh a awm thei. Chutiang chu a nih chuan a zavaiin a chungnung ber a ni theuh tihna a ni. Intihsiaknaah a ti tha ber pahnih pathum a awm theih, an zavaiin an that dan a inang tihna a ni.
Chutiang ni loah, an chungnun dan inang loah pakhatna, pahnihna, pathumna… an awm thin. Pahnihna chu ‘a tha ber pahnihna’ a ni lo; ‘a tha ber dawttu’ a ni. Chutiang bawkin pathumna chu ‘a tha ber pathumna’ a ni lo; a that dan indawta pathumna a ni zawk. Pahnihna leh pathumna hi ‘a tha ber’ an ni lo a, chu vang chuan, ‘a tha ber pahnihna’ emaw, ‘a tha ber pathumna’ emaw an ni lo ve ve.
Tunlai hian, han ti hluai i la, tunlai aia hma daih atanga an lo chin tawh pawh a ni thei e, “A lian ber pahnihna”, “A thiam ber pahnihna” tih angreng tawngkam mawi lo hi a tam riau mai a, tawngkam hawih lo tak a ni.
“A thiam ber pahnihna” ti loin “A thiam ber dawttu” an ti ngai. “Goal khung hnem ber pahnihna” ni loin “Goal khung hnem ber dawttu” tih hi tih dan thin a ni ngai. Pahnihna ni na na na ‘ber’ a ni thei tawh lo.
“Khawvela hausa ber pathumna” ti mai duh te an awm, “Khawvelah hausak lama pathumna, khawvela a hausa pathumna, khawvela mi hausa thlan chhuah zinga pathumna, a hausa ber dawt dawt leh,” hman tur apui a tam mai. Pathumna ni na na na ‘ber’ a ni thei tawh lo.
|awngkam dik rau rauah tawi fel deuh hman theih chuan a tha, dik lo puia tawi te lo hman ve ringawt kha chu tawng tihchingpenna a ni.
‘Ber’ ti na na na, pahnihna emaw, pathumna emaw, a awm thei lo; palina pawh, a dang pawh.