THUPUANGTUTE TAN

C. Lalrampana
A KAMKÊUNA
Radio, TV, NGO, Pãwl, Kohhran, vantlang, khawtlãng,, Pressure group, sipai, zirna in, office, sports, journalist, college, University, polititcal party, helpãwl, suamhmang etc. thlengin an huang chhunga mi emaw, pawn lam mi tan emaw, khawvel pum huap emawa hriattirna pawimawh puangzartu tur bika mi ruatte hi thupuangtu (announcer) chu an ni. Tin, Pathianin mihringte hnena a thu puangtu turin zawlnei te, vantirhkohte a nei bawk a; chung zawng zawng pawh chu thupuangtu (announcer) chi khat an ni thei bawk ãwm e.
THUPUANGTU CHUNGNUNNA
Mipui vantlãng mimir aia thupuangtute chungnunna leh danglam bikna hetiang hian tårlang ila. An tawng leh aw chhuak a fiah fel fai bik avangin ngaithlatute tan hriat a awlsam bik thin; midangte thusawi awlsam takin an man zung zung a, zawhna an siam let chawp zung zung thei thin; ziaka hriattirna an dawnte an hrethiam nghal zung zung thin; tawngkama hriattirna hlanchhawn awmzia an man zung zung thin; an hna kaih hnawiha hmanraw tul leh pawimawh chihrang hrang an hrethiam zung zung thin; an kuthnu a mawiin a tha a, midang tan chhiar a nuamin a awlsam bik bawk;
THUPUANGTU TUR CHU?
Sorkar emaw, pawl emaw, thupuangtu tur ruattu leh chu hna atana hna latu chuan thawk tlãk tura tehkhawng felfai tak an neisa thin. Chu tehkhawng chu miin a tlin loh chuan chu hna chu thawk tlãk a ni lo. Thupuangtu ni thei tura tehkhawngte chu:- Aw ring fiak fiah tha leh aw thum leh aw mawi tak kum 18-40 inkar; University graduate or equivalent; graduate in journalism & mass communication; bachelor’s degree in journalism, broadcasting, or communications; thu thehdarhna lama tawn hriat ngah tawh etc. Mizoramah hian hetiang thlapa lãk thupuangtu hi an tam lem lo mai thei. Mahse, an hnate an hnehin an tlin em em thova an fakawm hle. Heng bakah hian sports commentators-te pawh an awm zel a, sports commentators-te phei chu chihrang hrangin an then a, chungte chu:- play-by-play announcers, color commentators & sideline reporters-te an ni. Heng bakah hian play-by-play specialist leh color analyst, color commentators & broadcaster, disc jockey, newscaster, reporter, anchorperson, communicator, talker, telecaster, deejay-te an awm bawk.
ENGE AN THAWH?
Thupuangtute hi an pawimawh hle a, an tel lo chuan hringnuñ a famkim thei lo. An tihtur taima tak leh hneh taka an tih chuan ngaithlatu mipui tan phurna, hlimna,nawm na, zãuthãuna, hriatzãuna, inpumkhatna, inlungrualna leh inrintãwkna, tanrualna, inhmangaihtawnna thlenga thlen theitu an ni. Chung an tihturte chu:-live events, sports arenas, radio stations, television programs kaltlanga mawi leh nalh tak, dik taka mipui, pawl bik, zirlai, sipai, Kohhran, zirlai, damlo etc hnena hriattirna hlan chhãwna fak, sawi mawi leh fuihna thlen thinte a ni.
INZIR AN MAMAWH
Thupuangtute pawimawhzia leh mipui mimir aia an chungnun dan leh an hlut bikziate kan hre chiang ta. Khawvel huapa radio, television, films, sports arena, live event/telecast programmes hrang hrangte thlir hian an thupuangtute hian an hna an tlinin an hnehsawh hle a, ngaithlak, hriat, hmuh an nuam hle thin. Eng tawng pawh hmang se an hmang dikin an lam nãl a, an lam nalhin an ziak dik thin hle a, tihsual an nei tlem hle bawk. Hetih lai hian kan zorama thupuangtu hrang hrang vantlang ãurinna, YMA thupuangtu, Kohhran ziaktu, radio, TV, cable TV, DDK, sport, damdawi in etc .-te hian abikin Mizo tawng hmanga an thu puan chi hrang hrangah tihsual an ngah thei hle . Abikin Khaw hming, hmun hming, mihring hming, hnam hming, hun then hming, mizo thla hming, inkungkaihna hming, hmanraw hming, mizo tawng thluk, nihna hming, Bible chãng etc.ahte tihsual an ngah thei hle a. Mizotawng dik lo hman an ching hle bawk. Appointment letter meuh huma hnaa lãkte meuh si hian an puan chhuah, leh ziaka tar hma hian an aia thiamte rãwn hmasak nachang an hre lo nge, mahni inrintawknain risk an la pawp thin zawk em ni? Radio, TV, DDK meuha an han tisual phengphung mai thin hi chu a zahthlak thin hle. English, Hindi leh tawngdamg ni se’ng chuan ngaihhnathiam theih a ni. Mahni pianpui tawng ni reng si heti em ema tih dik loh an ngah thin hi chu an inenfiaha an INZIR a ngai hle tih a lang chiang hle.
TRAINING HUAIHAWT SE
Tunlai thang thar, thlah thar (new generation) thupuangtu radio local TV, local cable TV, DDK, NGO, YMA etc-a thawkte tan hian Mizoram sorkar I & PR department hian MZU & MAL hote nen tangrualin Mizotawng dik zirtirna training program huai hawt se a tihzia ngawt ang. Heti taka Mizo film stars, TV, DDK, vantlang Mike, pasaltha thawnthu chhiar, YouTube channel-a chanchinthar, thuthar puangtute’n Mizotawng dikna, hlutna leh zahawmna bo deuhthaw khawpa ngaithlatu mipui min han hmachhawn thin hi chu mahni hnam tawng hmelhriat tawk loh vang a ni tih a tilang chiang hle.
A TLÃNGKAWMNA
Thupuangtute hian mipui rilru leh thinlung an thunun thui thei hle a, a dik lo leh tha lo zawnga an zirtir hlauh chuan mipuiin an pawm hmiah mai thin a ni. Khing an tih dik loh thin tlãngpuite pawh khi tunlai thangtharte hian Mizo tawng dik zawkah ngaiin an ching hlen zui nghal mai bawk thin. A tam berte chuan mizo tawng dikah an pawm mai a, a dik tak tur zawk an hriat loh vang a ni. Tin, Mizo film stars-te, evangelist-te, missionary leh pulpita rawngbãwltute thleng pawh hian. Mizotawng dazãt an hmang nasa thin hle. Hnam fing apiangin mahni tawng an vawrh lãr a, an ngaisang a, tawng dik an ngainain an ngaisang a, an hnam a din chhuah phah thin. Social media hrang hrangah Mizo tawng dik tãwk lo leh ziak dik loh hmuh tur a tam thei hle. |henkhat phei chuan intihtheih nan leh íntihchangkan nan mizo tawng duhdah tak taka ziakin an inthawn tawn nasa thin hle. Hengte phei hi chu intihhmuh atana thil itawm tak chu a ni lo. Chuvangin, mithiam tak tak leh social media kal tlanga thupuang thintute leh ziaka mipui rawng bawl thintute hian mizo tawng dik thei ang bera hman thin i tum theuh thin ang u.