Biakzinte tan ropeway pahnih siamna tur pawm

Biakzinte tan ropeway pahnih siamna tur pawm
Sorkar laipui chuan Uttarakhand-a Kedarnath leh Hemkund Sahib tlawhtu biakzinte tana awlsam zawk turin ropeway pahnih siamna tur a pawm.
Siam zawh a nih hnuah chuan Hindu hmun thianghlim ber pakhat, kum tin mi maktaduai telin an tlawh, Kedarnath panna chu darkar 809 inkar atangin minute 36 lekah a titawi dawn a ni.
Tunah hian biakzinte hi tlang chhengchhe takah km 16 chu Gaurikund atanga Kedarnath thleng, kein emaw, sabengtungin emaw darkar 8-9 vel an kal thin.
Ropeway siam tur, Sonprayag atanga Kedarnath leh Govindghat atanga Hemkund Sahib hi Prime Minister Narendra Modi-a kaihhruaia Nilainia union cabinet thukhawm chuan a pawm a ni.
Kedarnath ropeway project hi km 12.9-a thui tur niin Rs. vaibelchhe 4,081 vel senna tur a ni a, khuarel tichhe lo zawng leh Kedar Valley trek tibuai lova tih tum a ni.
Ropeway hi tun laia a changkang ber, Tri-cable Detachable Gondola (3S) technology-a siam tur niin darkar khatah haw lam leh kal lam mi 1,800 phur thei tur a ni ang a, ni khatah mi 18,000 vel an chuang thei ang.
Kedarnath hi Hindu hmun thianghlim 12 zinga pakhat, Jyotirlingas awmna niin Uttarakhand-a Rudraprayag district-a awm a ni a, tuipui zawl atanga metre 3,583-a sang a ni a. Temple hi kum tin thla ruk/sarih vel, Akshaya Tritiya (April-May) atanga Diwali (October-November) thleng hawn thin a ni.
Hemkund Ji Sahib ropeway hi km 12.4 tur niin Govindghat atanga Hemkund Sahib Ji thleng tur a ni a, Rs. vaibelchhe 2,730.13 senna tur a ni.
Hemkund Sahib Ji thleng tur hian tunah hian Govindghat atangin km 21 kal ngai niin kein emaw, sabengtung emaw hmang chauhva kal theih a ni.
Ropeway hi biakzinten Hemkund Sahib Ji an tlawh awlsam zawk nan leh kumtluana Govindghat leh Hemkund Sahib Ji inkar a kal theihna atana tih a ni.
Nikum khan Hemkund Sahib Ji hi mi nuai 1.7-in an tlawh a, ropeway a awm chuan a let 10 velin tlawhtu an pun rin a ni.