Bial ennawn chungchangah party a nghak

ZPM treasurer C Laltanpuia’n party-ah lungawi a
inti a, party-a a tih tur pawh a ti nia sawiin, “Lungawi lohna em em lutuk a awm chuang lo e,” a ti.
Aizawl East I biala ding tura ngaih a ni a, mahse an party-in bial viltu tur an ruatah a lang lo. East I vil tura tih PL Liandinga inhnuhdawhtir a nih hnuah an vice president Lalthansanga an ruat a, C Laltanpuia hian Lalthansanga hi bial chhungah Inrinni khan a kal kualpui.
An inzui lai thlalak hi social media-ah a darh a, he thlalak hi a dik thu sawiin C Laltanpuia chuan, Lalthansanga hi a kalpui ngei thu a sawi.
A campaign-pui zel dawn em tia zawhna chu, “Kei hi ka tul em mai a… a remchan dan azir a ni ang chu,” tiin a chhang.
June thla tir lamah khan party-ah lehkha a thehlut a, thil sawifiah tura ngenin June ni 15 thleng a nghah tur thu a ziak. Hemi chungchang hi a fel tawh niin a sawi a, “Harsatna a awm tawh lo e,” a ti.
A lehkhaah hian elected office bearer a ni chunga Nomination Committee-a a tel loh chhan a zawt a, hei hi tihfel a ni tawh nia sawiin, Nomination Committee-ah a tel tawh tih a sawi.
Lehkhaah hian bial vil tura ruat chungchang ennawn a duh thu a sawi a, hei hi tihfel a nih loh thu sawiin, “Nakinah mumal takin kan la sawiho leh ang,” a ti.
Bial vil tura ruatte chungchangah ennawn tul tih a neih thu a sawi a, “bial thenkhat” tiin hemi chungchang hi a sawi. “A tul tih lai ka nei a,” a ti a, hei hi la ngaihtuah tur a ni tia sawiin, “Thlak a ngai lo kan ti dawn a nih pawhin a tul loh chhante kan sawiho ang chu,” a ti.
Aizawl East I-a ding tura ngaih a nih chungchangah, “a hma chuan tum ve thin e” a ti a, he bialah emaw bial dangah emaw din a tum em tia zawhna chu, “Tum leh tum loh pawh ka nei chuang lo. Pathian remruatah ka dah,” tiin a chhang.