Environment humhalh duhtuten NHIDCL hnathawh dan sawi ho

Centre for Environment and Social Justice (CESJ) chuan tun dinhmuna NHIDCL kawng laih hna kal tawh leh kal meka ram leilungfate zahna nei lo leh environment dan leh hrai zawm loa an thawh avanga environment-in a chhiat phah chu pawi an tih thu an sawi.
Thawhlehni khan Aizawlah CESJ huaihawt hian Mizorama hmasawnna hna thawhin environment a nghawng dan chungchangah inrawnkhawm a ni a. Development lo la kal leh tura kan environment venhim chu ram leilungfate mawhphurhna a nih thu CESJ hian sawiin, environment venghim chunga hmasawnna hna thawh a nih theihna’na hmalak dan tur sawi ho niin, NHIDCL lamin an hnathawh dan phung an sawifiah bawk.
Kum 1999-a World Bank sum hmanga Aizawl – Lunglei kawng laih khan, Mizoram PWD chu contractor-te iptepui banna’n hman an ni tih sawi niin, PWD chuan environment him theihna’n hneh takin an lo thleng a. Mizo ngei, mithiamten Environmental Impact Assessment (EIA), Environment Management Plan leh Resettlement Action Plan an tih theihna’n kawng an sial tih a, environmental clearance pawh an nei tih an sawi a ni.
EIA tih a nih lai hian hmun pakhatah ramhmul damdawi, hnim vang tak hmuh a nih avangin chulai kawng chu tihdanglam a ni a. Hmun dangah ramsa vang tak hmuh a nih avangin environmental clearance tihkhawtlai a nih phah bawk, tih te sawiin, National Highway Infrastructure Development Corporation Limited (NHIDCL) in environment pawisakna nei loa heti tak maia nasa leh khawvel ningkhawng hmua hre ve lo ang maia an suasam chu an dem takzet tih CESJ aiawhte chuan an sawi.
NHIDCL-in an hnathawh dan tur leh hma an lak zel dan tur ruahmanna an siam chu tha an tih thu kalkhawmte hian sawiin, ruahmanna an siam anga hna an thawk lo thin chu pawi an tih thu an sawi a. Hnathawh dan leh hmalak dan tur an duansa ang taka thawk zel tawh turin NHIDCL hotute chu an ngen a ni.