Bial mipui dawr theihin kalchilh

Bial mipui dawr theihin kalchilh
Tawi bialtu MLA, minister Prof Lalnilawma chuan a bial chhung khaw thenkhat – Thingsulthliah, Seling leh Thingsul- Tlangnuamah bial mipuiin awlsam zawka amah an dawr theihnan Ningani khan public interview a hawng.
Bialtu MLA chuan inthlan campaign laiin, Tawi bialtu MLA-a thlantlin a nih chuan bial chhung mipui nen awlsam zawka an indawr theihnan hun a hmang thin ang, tiin a lo sawi tawh a, a thusawi a taka a bawhzui thei ta chu a lawm hle tih a sawi.
Minister hial a nih ve tak avangin official work a tam hle a, duh anga zingin bial chhunga hun hman a har mah se, a remchan dan ang zelin khaw hrang hrangah a tahtawlin mipui dawr theihin thut zel a tum tih a sawi a ni.
A bial mipui kalchilh a, awlsam zawka amah dawr theihna hun a siamah hian bial chhung mipui thahnem takin an dawr a, khawtlang mamawh leh harsatna an lo thlen.
ZPM party kaihhruai sawrkar chuan theihtawpin Mizoram hmasawnna atan a thawk zel tih Prof Lalnilawma hian a sawi a. Chief minister leh minister dang zawng zawngin theihtawp takmeuh an chhuah a, mipui pawhin sawrkar hmalakna thlawp zel turin a sawm tih a sawi. “Sawrkar hmalaknaah duh khawp lohna a awm a nih pawhin, sawisel lama ramtang mai loin, minister-te leh sawrkar official-te finchhuah a, thurawn pe fo zawk turin mipui ka ngen a ni,” a ti.