Dr J.T. Vanlalngheta,
PhD (Biblical Studies)
-- Advertisement --
LLB kan zir ve lai khan, kan zir lai (course)-ah hian ‘Maxims of Equity’ hi kan zir tel ve a; Equity’ awmzia chu sawi fiah lo mai ila. Equity thu thu fing tawi zinga pakhat chu ‘He who seeks Equity, must do equity’ hi awm a, a awmze hnai tak chu ‘Equity tanpuina dil chu a dik hmasa ngei tur a ni (…Equity zàwm mi a ni tur a ni) tiin dah ta ila. Tin, hei lo pawh hi ‘He who comes to Equity, must come with clean hands’ tih a awm bawk a, a awmzia hi ‘ ‘Equity tanpuina dil tura lo kal, kut chu a fai tur a ni’ emaw, ‘Equity tanpuina ngen tuma lo kal chu kut fai mi (mi dik) a ni bawk tur a ni’ tiin dah ta mai ila. He thu fing tawi (Maxim) pahnih awmzia hi hrangin lang mah se, a sawi chhuah tum erawh chu a thuhmun tho niin a lang.
Tunlai hian Mizo tawng dik leh dik lo sawi hona whatsapp group hi a awm nual tawh a, chungah chuan Mizo Bible lehlinna tawngkam dik lo nia an hriat thenkhatte chu rawn tar chhuakin an chai thin a. Bible (Pathian aw) sawisel ni lova Mizo tawnga an lehlinna tawngkam han khel bap bap hi chu thil thiang lo chu a ni lo vang; a kheltute khan tawngkam hman dan dik zawk leh a grammar tha zawkte hmuh chhuah tuma an khel nia a lan avangin; amaherawhchu, mi thenkhat, Mizo tawng tlar hnih khat pawh ziak dik thei lovin Bible lehlinna tawngkam an han sawisel ve ngawt zel hi chu a huaisenthlakin a fel lo hlein ka hre thin. Mizo tawng sawi hona huanga awmte hi kan inenlet a ngai hlein ka hria. Bible a ni emaw lehkhabu lehlin dang a ni emaw, mi thu ziah hrim hrim thlir lêta sawisel tumte thu ziah chu a dik/a fai hmasa tur a ni. Kawng danga sawi chuan, Bible tawngkam sawisel tur chuan chumi chu mitena mi thiama an ngaih tling phak a ni ngei tur a ni, Hebrai leh Greek thiam tel lam chu thu hran pawh lo ni se. Chuti lo chu, mahni (mahni’n Zotawng) hmang dik thiam si lova mi dang thu ziah sawisel hmang Zofate-ah thangtharte hi kan inchhuah mai a hlauhawm hle. A kimin Bible lehlinna tawngkam phei hi chu thlir let tur chuan fimkhur hle a ngai; a phur nazawng emaw Zotawng thiam inti nazawng emaw zir nazawng emaw sawisel chi a ni lo; Bible pawh a ti zahwm lo bawk. Kan thlir let duh a nih pawhin fimkhur takin tih ni se; tawngtai hmasak zet pawh a tul ngei ang; chubakah, chhut hlui leh chhut thar atangtein a Hebrew, Greek leh English tea chang thuhmun chi 3 tal chu tar chhuah ni se. Zotawng hman dan dik pangngai (usage)-in an ziak dik thiam ngei bawk tur a ni. Mi thenkhattena Bible tawngkam an sawiselna Zotawng an hmanah hian dik lo a awm teuh zel tho si hi chu kan inen lêt fe chu a ngai. Heng atang hian mahni eng mah ni si lo va mi dang sawisel ching tak leh mahni tawka hnam chapo tak angin kan lang thei dawn alawm le! Chubakah, kan sawisel dawn a nih chuan edition hnih/thum tal dah chhuak thei ila, chuti a nih loh chuan a tawngkam hman hi sawisel ngawt loh a tha ber. Mi pakhatin a sawiselna kha ka lo en ve a; mahse, Re-exited 2017-ah chuan an lo thlak daih tawh a lo ni a; mahse a sawiseltu chuan he Re-edition hi a thlir tel hauh si lo. Chuvangin, Mizo tawng ziah dan tha hmangaih mi kan nih pawhin Bible tawngkam sawiselna lamah kher hi chuan a mi nawlpuite hi chu ( helama mi thiam kan nih miau loh avangin) Zotawng zirna group neuh neuhah te hi chuan sawisel tur atan Bible tawngkam hi i dah chhuak zen lo vang u, hemi laka insum hrâm hrâm chu ringtute tih makmawh zinga pakhat a ni ngei bawk ang. A thu leh hla zawngin kan khel ti mah ila, Bible zah lohna a keng tel tho tih pawh hriat tel ni se.