By Rev Dr Ramengliana
-- Advertisement --
Mi tam takin, “Fapa Tlan Bo” tehkhin thu hi “Pa Hmangaihna Mak,” tih tur zawk niin an hria. He tehkhin thu hian a tihlan tum chu fapa tlan bo ta chanchin aimahin a pa hmangaihna ropui tak, Pharisaite leh fapa u zawkin a hriat thiam loh kha a ni zawkin a lang. A hma chiaha “Duli bo,” leh “Beram bo,” tehkhin thute nena tangrual, Pathian hmangaihna makzia Lal Isuan a sawina a ni. Chu chu Pathian ‘Khawngaihna Mak, Mawi leh Duhawm’ kan tih thin chu a ni.
Mi sual hma a ngai
Pa hmangaihna chuan a fapa naupang zawkin a duhzawng a dil khan a duh ang taka a awm theih nan a phalsak mai a. A ro chan ai zawng zawng kha advance-in a pe hmak mai a ni. Pa hmangaihna chuan a fapa chunga a mawhphurhna chu a ro chan ai pekah khan a tawp taah a ngai bawk lo a. Ni tinin a khawsak dan tur te a thlir a, thil tha lo leh duhawm lo-ah a inti bawrhbang thei tih a hria a, khawvel thianten a chan a chhiat hnuah eng atan mah an ti dawn lo tih hriain a lo kir leh hun tur a lo nghak reng a ni. Chumi ni a thlen meuh chuan a fapa dinhmun chu a chhe hle mai. Chhuan tur a nei miah lova, fapa khan han chapopui tur a hre ngang lo a ni. “I fapaa vuah tlak ka ni ta lo, i chhiahhlawhte zinga mi tê ber angah mi siam ve rawh,” tih kha thil phutna (demand) ni lovin, khawngaih dilna a ni. A pa hmangaihna erawh chuan a fapa thawnhnaw tenawm tak leh a nun tenawm tak kha a lo hmu langsar miah lo thung a. A sum theh thang zah, nawhchizuar engzah nge a dawr, mi engzahnge a bum a, engtiangin nge a va ruih thin, engmah a zawt lo. A lo fawp ngawih ngawih mai zawk a ni. Pa-in a fapa, a hnen atanga tlanbo thei khawpa puitling tawh chu a ir chuktuahin a fawp ngawih ngawih mai a ni. A hlawhchhamna avangin a diriam lova, sualin a tihnat leh hrehawmna avangin a tuar zawk. Chu chu a ni Pathian hmangaihna chu. Hmangaiha nihna leh dinhmunin hmangaihtu hmangaihna a dal lo. Hmangaihtu chuan hmangaiha hma a ngai ngawih ngawih a ni.
A mawina leh a duhawmna
Pathian khawngaihna thu hi tehkhin thu pakhat hian a sawifiah vek zo lova, Fapa tlan bo tehkhin thuah hian Pathian hmangaihna leh misual chung chang kan hmu. A fapa sualna kha buru khawp mai. “Ka pa, ka rochan ai mi pe rawh,” tih kha an culture-ah chuan, “Ka pa, thi tawh la ka va ti ve. Thi thuai thuai rawh,” tihna tluk a ni e, an ti. A pa rorelna leh thatna zawng zawng lakah khan a hel a ni. Tichuan ama tana nungin, amah chauh inngaihtuahin nawmsip a bawl ta a ni. A chhungte a ngaihtuah pha reng reng lo. A neih zawng zawng a chen da thak a. Mahni chauh inngaihtuah thin a ni. Chutiang mi pawh chu Pathian hmangaihna chuan a lo tuam hlawm a, a fa atan a iai reng reng lova, thi-a tho leh angin, a tlan bo hmaa a enkawlna aia thain a lo enkawl a, malsawmna thar tam tak a vur ta zawk a nih kha. A nih ang anga lo pawmtu Khawngaihna leh Malsawmtu hmangaihna chu hetah hian kan hmu a. Duli bo leh Beram bo tehkhin thuah hian Pathian misualte zawng chhuaktu- Zawngtu Khawngaihna chu kan hmu bawk a ni. Misual chhandamna hi a bul atanga a tawp chu ‘Khawngaihna Mak, Mawi leh Duhawm’ hi a ni reng dawn a ni.
Hlawh chhuah loh
Pathian khawngaihna awmzia hi man thelh a nih a hlauhawm thin. Pathian khawngaihna keimahni lama lo lang chhuak Simna leh Rinna (Chhandamnaah chuan pawisa hmai hnih anga paih bik awm thei lo ve ve) kan sawi thin avang hian, heng Simna leh Rinna-te hian kan Chhandamna chu kan thleng emaw, Khawngaihna chu kan hlawh chhuak emaw ti deuh mai kan awm. Kan ti chiah lo a nih pawhin heti zawnga ngaihtuahna hian min hneh tlangpui a ang thin. Sim leh rin hian Chhandamna phu riau a inngaih hi a awm thei awm asin. Sim ringawt mah ila, ring ringawt mah ila, Pathian khawngaihna tel lo chuan chatuan nunna a tlen chuang lo. Chu chauh a ni hleinem, Pathian khawngaihna hnathawh tel lo chuan misual hian a simin Isua a ring thei lo bawk a. Simna leh Rinna hi khawngaihna tel lovin awm thei pawh ni ta se, chhandam turin engmah a thawk chhuak zo lo a. Kan sima kan ring hi Pathian khawngaihna vanga Thlarau Thianghlim hnathawh kan chunga thleng a ni zawk a ni, chu chu chhandamna changtute nunah chuan hmuhin a awm zel thin. Misual nuna Simna, Rinna lo lang chhuak zawng zawng hi Pathian Khawngaihna hnathawh, phu lo misualte hnena pek, Khawngaihna Mak dawngtute nuna lo lang chhuak a ni. Sim tura koh i nih a, Ring tura sawm i nih hian Pathianin , “Chung thilte chuan chhandamna hi i rawn thleng dawn nia. Nangmah lamah Simna leh Rinna rawn keng la, Khawngaihna hi rawn hlawh chhuak ang che, i phu e,” a ti lo a ni. Simna leh rinna hian Chhandamna a hlawh chhuak zo lo va, hlawh chhuak tura tih pawh a ni lo tih hriat tur a ni.
Phu loh malsawmna
Khawngaihna chu hmangaihna hlir hlak, ‘phu loh/ thawh chhuah loh malsawmna’; tling lo misualte chunga Pathian duhsakna lo thleng a ni. Misual chuan a thawh chhuah reng reng loh, a neih phak reng reng loh chu a lo dawng tawp mai a ni. Hetah hi chuan simna leh rinnaa hlawh chhuah emaw thlak thleng tum emaw a awm tawh lova, suala nun zui zel theih a nih leh nih loh a buaipui tawh lo. A nun hlui leh kha Khawngaihna a dawn kha a inthlauvin a inpersan lutuk a, a dawngtu chuan a luhchilh mai thin. Fapa tlanbo khan chu khawngaihna chu a dawng chiang khawp mai. A pa hnena a let lehna khan chu khawngaihna chu a thlenga, a lei a ni lova; nuam tawl zel chungin a pa fapa a ni chhunzawm thei tho pawh a ni lova (a nuam tawl zawng zawng ai khan a Pa-in a vur malsawmna zawng zawng kha a duhawmin, a ropui zawk fe tawh si). Kha fapa sual, mahni pa leh unau tlanbo santu, ama inhriat danah pawh chhiahhlawh pakhat dinhmun pawh sang tak ni tawh khan KHAWNGAIHNA avangin fapa nihna, kawr mawi ber ber, zung bun, ruai ropui thehsak a dawng ta a nih kha. Ringtuten thlarau lam malsawmna tinreng kan chan – fa nihna te, ngaihdamna te, thiamchanna te, thianghlimna te, ropuina te, etc., zawng zawng hi Pathian khawngaihna chu a ni. A fa nih tawh hnu-a kan sualnate palzama en kan zelna a ni lo va; a pa in atanga tlan chhuah leh pawha a fa nihna la chen zui zel theology pawh a ni lo. Pa ina malsawmna sang ber chen a ni zawk.
Nih ang anga kalsan lo
Pa leh a fapa indawrnaah khan fapa tlanbo sualna zawng zawng kha buaipui a ni lo. Pa-in a hriat reng sak lo va, kha mi a innghat khan a dawr lo; keini pawh kan sualna zawng zawng kha min en sak tawh lova, A fapa inthawina avangin a fa atan min pawm mai zawk a ni e. Chu chauh pawh a ni la ni lo. Laiking fa nei an sawi ang hi kan ni hauh lo va. Kan nih angin min pawm a, kan nihna anga awm reng tur chuan khawngaihna min pe hauh lo mai. Kan nihna hlui kan kalsan theih chhan chu kan pianthar hma ang lovin Awmpuitu kan neih tak vang a ni. Zakhamna Thlarau Thianghlim, tinungtu leh zirtirtu chu min pe a. Piangthar zawng zawngah chu chu a awm ang. Chuvang chuan vawiina Kristian nuna kan thiltih hi kan chhuang lo, a chhan chu khawngaihna vang chauha chhandam kan nih kan hria a, keimahnia Thlarau Thianghlim hnathawh chhunzawm zel avang chauha Kristian nun nei thei kan ni. Hei vang hian alawm, kan nunah leh, ringtu zawng zawng nunah, kan rinna chu thiltihin a rah chhuak ngei ang tih kan hria. Khawngaihna dawng, piangthar leh piangthar lo, midangah leh mahnia inhriat awlsamna ber chu Thlarau Thianghlim ni lo thildang – zu, drugs, hurna, sum, chapona, etc,. hian kan nun a thunun em? tih hi a ni. Thil dang min control tlattu a awm a nih chuan, mi hriatah kan hmai mam viau mah se, Chhandamna kawngah chuan ngaihthatna chhan tur a vang hle ang.
A changtu dik
Chu khawngaihna dawngtu chuan, “Sual hi a nuam a, chen ka duh bawk a, mahse vanram kai ka duh bawk si. Ka sualna zawng zawng nen hian Vanram ka kai thei dawn em? Khawngaihna avangin a theih a ni maw? Ka rin phawt chuan suala nung reng chung hian Chhandam ka ni thei dawn maw? A va tha ve. Eng ang pawhin sual ila ka chhandamna a bo thei tawh lo maw? Chu chu ni maw Khawngaihna chu? Han tum thin mah ila kan tha tak tak ngai lo reng a ni,” a ti ngai lo. A ni lo bawk. Chutiang chu a loh berah Setana khawngaihna a ni ang. Pathian Khawngaihna Tak dawngtu erawh chuan, “Ka sual hi Pathian hmaah a va tenawmin ngaihdam tlak pawh ka va ni lo em! Ka sualna lam en miah lovin Krista zarah ngaihdam ka ni a, thiam chantir ka lo ni ta maw? Chutiang chuan Pathianin misual chungah ro a rel a ni maw? A va mak ve. Malsawmna tinrenga min vurin a roluahtu atan min siam a duh maw? Thlarau Thianghlimin min chhinchhiah maw? Sual hnehna nun min pe maw? Kohhran ho zingah min dah maw? Chu khawngaihna mak chu a ni maw van thlen thlenga min hruaitu tur,” tiin van hla a sa tawh zawk a ni.