Nilaini zanah 2-1-a mualneitu Real Betis hnehin Barcelona chuan Spanish La Liga table-a an hmahruaina an sawh-nghet a, league khelh 19-ah point 50 nei tawhin, anmahni hnaihbertu Real Madrid nen point riat ngawtin an inthlau hman a, Ningani zanah Los Blancos-in sihnih faia an mikhual Valencia hneh ve lehin, Catalan team nena an inthlauhna chu point nga bawkin an pawthniam leh.
-- Advertisement --
Santiago Bernabeu inkhelah first half chhung-in goal a lut lo a, second half tir lamah minute hnih chhungin mualneitu team-in goal hnih an thun hman a; an goal hmasa zawk hi minute 52-a Marco Asensio tihluh niin, minute hnih a liam leh rualin Brazilian forward Vinicius Jr chuan Real goal hnihna a thawh ve leh a, Spanish giants tana game 200 a khelh tlin zanah mimala mellung a phun chu goal-in a lawm.
Valencia buaina belh-chhah turin minute 72-ah Vinicius Jr chhuihtu Gabriel Paulista chu straight red card hmanga hnawhchhuah a ni a; a tam zawk an nih hnuah mualneitu team-in goal dang an thunbelh zo ta chuang bik lo.
He inkhelah hian first half hun pakbelhah Antonio Rudiger chuan Luka Modric-a ball cross atangin Real hma-hruaina goal thunin a inhre hman a, mahse, video assistant referee-in kha goal luh laia box chhunga Yunus Musah laka Benzema ‘foul’ a lo hmu fuh a, Rudiger-a goal hi hnawlsak a ni.
Kum 35 mi France forward Benzema hi darkar khat vel a khel hman tihah khelmual atanga lakchhuah niin, a malpui dawm chungin khelmual a chhuahsan a, February ni 21 Cham-pions League last-16 first leg-a Liverpool an luhkhung hunah a hliam hian nghawng a nei pha dawn em tih zawhna a piang nghal a, hemi chungchangah hian manager Carlo Ancelotti chuan Benzema hliam chu a hlauhthawnawm loh niin a sawi.
DAZN hnenah An-celotti chuan a striker hliam hungchang sawiin, “Ni thum dana inkhelh zat zat chuan awmdamna hman a awm lo a, hetiang thil hi chu a thleng ve chawk alawm,” a ti.